បន្ទាប់ពីទទួលព័ត៌មានថា នាយក Miss Grand International លោក ណាវ៉ាត់ និងបេក្ខនារី Miss Grand Thailand 2023 ចំនួន ៨រូប រៀបនឹងធ្វើដំណើរទៅកាន់ប្រទេសខ្លួន ទស្សនិកជនវៀតណាមនាំគ្នាសម្ដែងការខឹងសម្បារព្រោងព្រាត ព្រមទាំងជំទាស់មិនចង់ឱ្យនាយករូបនេះចូលស្រុកខ្លួននោះទេ។

ដោយសារបញ្ហា​ភាពចម្រូងចម្រាស​កាលពីពេលប្រកួត Miss Grand International 2022 អំឡុងខែតុលា ឆ្នាំមុន ទស្សនិកជនវៀតណាម នៅតែមិនទាន់រលុបកំហឹងលើ លោក ណាវ៉ាត់ ដែលបវរកញ្ញាតំណាងវៀតណាមមិនបានចូលវគ្គកំពូល ១០នាក់ចុងក្រោយ។ រហូតមកទល់ពេលនេះ នៅពេលឮដំណឹងថានាយក MGI នឹងទៅទស្សនកិច្ចនៅវៀតណាម ដើម្បីត្រៀមរៀបចំប្រកួត Miss Grand International ឆ្នាំ២០២៣ នៅទីក្រុងហូជីមិញ អ្នកាគាំទ្រនាំគ្នាបដិសេធវត្តមានរបស់លោកយ៉ាងផុសផុលពេញបណ្ដាញសង្គមតែម្ដង។

ជាមួយគ្នានេះ អ្នកស្រី Pham Kim Dung នាយិកា Miss Grand Vietnam បានចេញមុខស្នើសុំចិត្តអ្នកគាំទ្រឱ្យស្វាគមន៍ភ្ញៀវឱ្យបានកក់ក្ដៅ ហើយបំភ្លេចរឿងពីមុនចោលផងចុះ។ តាមរយៈសារបង្ហោះនៅលើផេកផ្លូវការរបស់នាយិការូបនេះ បានសរសេរថា “អ្នកគាំទ្រជាទីរាប់អាន! Dung សង្ឃឹមថា ពួកយើងនឹងបង្ហាញស្មារតីបដិសណ្ឋារកិច្ច មិនអើពើនឹងរឿងចាស់ ហើយបង្ហាញភាពរួសរាយរាក់ទាក់ និងស្និទ្ធស្នាលពេលភ្ញៀវមកផ្ទះ។ វត្តមានរបស់គណៈប្រតិភូ Miss Grand Thailand នៅប្រទេសវៀតណាម នឹងចូលរួមចំណែកលើកស្ទួយវិស័យទេសចរណ៍ វប្បធម៌ និងប្រជាជនវៀតណាម។ ដូច្នេះយើងគួរស្វាគមន៍ដោយស្មារតីកក់ក្តៅបំផុត” ។

ទោះយ៉ាងណា នៅលើបណ្ដាញសង្គមឯណោះវិញ អ្នកលេងអ៊ីនធឺរណិតវៀតណាម នៅតែបង្ហាញភាពមិនសប្បាយចិត្ត ហើយនាំគ្នាលើកឡើងថា ពួកគេនឹងមិនទៅព្រលានយន្តហោះដើម្បីស្វាគមន៍គណៈប្រតិភូ Miss Grand Thailand នោះទេ៕

ប្រែសម្រួល៖ សន្យា

ចុចអាន៖ ស្ថាបនិក Miss Grand International លោក Nawat ដាក់ចំៗលែងទុកមុខឲ្យ វៀតណាម

ចុចអាន៖ បង្កើតកម្មវិធី Miss Grand ១០ឆ្នាំហើយ លោក ណាវ៉ាត់ សល់ទ្រព្យផ្ទាល់ខ្លួនប៉ុន្មានទៅ?