ជីវិតកម្សាន្ដ

ត្រួសៗពី Miss Grand ភូកេត ដែលព្រហើនហ៊ានប្រមាថលើទង់ជាតិ កម្ពុជា

បានផុស

២ ខែ មុន

នៅ

ថ្ងៃពុធ ២៩ មីនា ២០២៣

ដោយ

ម្ចាស់មកុដ Miss Grand ភូកេត២០២៣ នាង Tia Li Taveepanichpan បានធ្វើឲ្យប្រជាជនកម្ពុជាមានការខឹងសម្បារយ៉ាងខ្លាំង បន្ទាប់ពីនាងបង្ហោះ story នៅរូបភាពកាត់តទង់ជាតិខ្មែរដាក់លើរូបសត្វទន្សង ដែលភាសាថៃតំណាងឲ្យសត្វដែលគេប្រើប្រាស់ ឬជំនួសឲ្យពាក្យជេរបញ្ចោរគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមកនាងក៏បានចេញសារសុំទោសប្រជាជនកម្ពុជា បន្ទាប់ពីមានការប្រតិកម្មពីបវកញ្ញាពេជ្រ វត្តីសារ៉ាវឌ្ឍី និងមហាជនជាច្រើន។ ប៉ុន្តែយ៉ាងណាក៏ដោយ វាមិនបានធ្វើឲ្យអ្នកគាំទ្រ ជាពិសេសមហាជនស្រាកស្រាន្តកំហឹងនោះទេ ព្រោះនេះជាការប្រមាថកាត់ទានមកលើប្រជាជនកម្ពុជាទាំងអស់។

ទន្ទឹមនេះដែរមានមហាជនជាច្រើនក៏បានដឹងថា នាង Tia Li Taveepanichpan គ្រាន់តែជាម្ចាស់មកុដ Miss Grand ភូកេត២០២៣ប៉ុណ្ណោះ តើមាននាងឥទ្ធិលពលយ៉ាងណាឬសាវតារបែបណា ទើបហ៊ានមើលងាយមកលើទង់ជាតិ កម្ពុជា។

បវរកញ្ញា Tia Li Taveepanichpan មានអាយុ ២៦ ឆ្នាំ កម្ពស់ 1.70m នាងគឺជាតារាសម្ដែង និងតារាបង្ហាញម៉ូដជនជាតិថៃ-ចិន-អាហ្វ្រិកខាងត្បូង ដែលកើតនៅសហរដ្ឋអាមេរិក ហើយធំធាត់នៅភូកេត នៃប្រទេសថៃ។ នាងទទួលបានតំណែងជា Miss Teen Thailand កាលឆ្នាំ ២០១២ ក្នុងនាមជាតំណាងមកពីប្រទេសថៃ ដើម្បីចូលរួមប្រកួតប្រជែងក្នុងកម្មវិធី Asia’s Next Top Model Season 2 ដោយបញ្ចប់ក្នុងចំណាត់ថ្នាក់លេខ៨ ក្នុងចំណោមបេក្ខនារី ១៦នាក់ទូទាំងទ្វីបអាស៊ី។ ចាប់តាំងពីពេលនោះមក នាងបានបន្តបង្ហាញមុខក្នុងពាណិជ្ជកម្មនានា។

បន្ទាប់មកនៅឆ្នាំ ២០១៦ នាងចូលរួមប្រកួតប្រជែងក្នុងកម្មវិធី The Face Thailand រដូវកាលទី ៣ ដោយស្ថិតក្នុងក្រុម Mentor Bee Namthip Jongrattavibul។ ក្នុងឆ្នាំ ២០១៨ នាងបានចូលរួមប្រកួតប្រជែងក្នុងកម្មវិធី The Face Thailand រដូវកាលទី ៤ ដោយមានវត្តមាននៅក្នុងក្រុម Mentor Bee Namthip Jongrattavibul ម្តងទៀត និងមានអ្នកណែនាំម្នាក់ទៀតគឺ Sririta Jensen ដែលកាលណោះនាងទទួលបានតំណែងលំដាប់រង។

ដោយឡែក នៅខែមករាឆ្នាំ ២០២៣ នាងចូលប្រលង Miss Grand Phuket ឆ្នាំ ២០២៣ ខណៈសម្រស់ Tia Li Taveepanichpan ធ្វើឲ្យនាងឈានដល់ការគ្រងមកុដ Miss Grand Phuket 2023។ នាងទទួលជោគជ័យនិងត្រូវបវរកញ្ញា Amanda Jensen ដែលជាអតីត Miss Grand Phuket 2022 ហើយក៏ជាបវរកញ្ញារងទី១ Miss Grand Thailand 2022 បំពាក់មកុដដោយដោយផ្ទាល់ដៃផងដែរ។

យ៉ាងណាមិញ ក្រោយឈ្នះមកុដ Miss Grand Phuket 2023 នាងនឹងតំណាងឲ្យកោះភូកេតទៅចូលរួមការប្រកួត Miss Grand Phuket 2024 ដែលនឹងប្រព្រឹត្តទៅនៅទីក្រុងឈៀងម៉ៃ និង ក្រុងបាងកក ក្នុងខែមេសាខាងមុខនេះ។ ប៉ុន្តែចំពោះជោគវាសនានាងយ៉ាងណា ទស្សនិកជននៅមិនទាន់ដឹងនូវឡើយទេ ខណៈពេលនេះបវរកញ្ញា Tia Li បែរជាបង្កកំហុសឆ្គងដ៏ធំមកលើប្រជាជនខ្មែរក្នុងន័យប្រមាថមាក់ងាយទៅវិញ៕