សមាជិកក្រុមចម្រៀងកូរ៉េ Treasure ត្រូវអណ្ដាតភ្លើងឆាបឆេះពេលប្រគំតន្ត្រីនៅថៃ

កាល​ពី​ដើម​សប្ដាហ៍​នេះ សមាជិក​ក្រុម​ចម្រៀង​ប្រុស​កូរ៉េ Treasure ម្នាក់​ត្រូវ​ភ្លើង​ឆេះ​អំឡុង​ពេលលោកកំពុងតែប្រគំតន្ត្រី​រួមក្រុម​ក្នុង​ប្រទេស​ថៃ បង្កឲ្យមានការ​ភ្ញាក់ផ្អើល​យ៉ាង​ខ្លាំង​លើ​បណ្ដាញ​សង្គម។

​ហេតុការណ៍នេះបានកើតឡើងនៅពេលដែលតារា​ប្រុស Yoon Jaehyuk កំពុង​ដើរឡើងលើឆាក ស្រាប់តែ​អណ្ដាត​ភ្លើង​នៅ​ចំហៀង​ខ្លួន​ឆាបឆេះ​ផ្នែកខ្លះ​នៃ​រាងកាយ​របស់លោកតែម្ដង។ ភ្លាមៗនោះដែរ​ តារា​ចម្រៀង​​រូប​នេះ​បាន​ចុះ​ពី​លើ​ឆាក​យ៉ាង​រហ័ស​ ដើម្បី​ទៅរុំ​របួស មួយភ្លែតលោកក៏​វិលមកក្រុ​ម​វិញដោយទស្សនិកជនបាន​ឃើញ​ដៃ​ស្ដាំ​របស់លោកមាន​បង់រុំជាប់។ ជាសំណាងល្អ Yoon Jaehyuk អាចសម្តែងបានដូចធម្មតា ហើយលោកក៏​បាន​ដោះ​បង់​រុំ​ចេញ​ផង​ដែរ ពេល​ដែល​កម្មវិធី​បាន​បន្តទៅមុខ។

បន្ទាប់​ពី​ការ​​ប្រគំតន្ត្រីបានបញ្ចប់ Jaehyuk បាន​បង្ហោះឃ្លិបមួយនៅបន្ទប់​សណ្ឋាគារ​របស់​លោក ដើម្បី​ធានា​ដល់​អ្នក​គាំទ្រ​ថា​គាត់​មិន​អី​ទេ ហើយ​ប្រាប់​ថា​កុំ​បារម្ភ “គ្មាន​បញ្ហា។ សូមមើល? ខ្ញុំ​សុខសប្បាយ! ខ្ញុំ​ឮ​ថា​អ្នក​រាល់​គ្នា​បារម្ភ​ពី​ខ្ញុំ។ ខ្ញុំពិតជាមិនអីទេ” ។

ទោះយ៉ាងណា អ្នកគាំទ្របានសម្តែងការព្រួយបារម្ភថា នេះមិនមែនជាលើកទីមួយទេ ដែល​ឧបទ្ទវហេតុ​បណ្តាលមកពី​បញ្ហា​ឧបករណ៍ បានកើតឡើងនៅ​ក្នុងការ​ប្រគំតន្ត្រី​ដែលរៀបចំដោយ YG Entertainment ​ជា​ភ្នាក់ងាររបស់ Treasure ។ អ្នក​និយមលេង​អ៊ីនធឺណិត​ម្នាក់ទៀត​ក៏​បាន​ចង្អុល​បង្ហាញ​ថា ប្រសិនបើ​ជា​តារា​ចម្រៀង​ស្រី​ស្លៀក​ពាក់​សំពត់​ខ្លី ឬ​ខោខ្លី ផល​វិបាក​អាច​នឹង​ធ្ងន់ធ្ងរ​ជាង​នេះ។

ដោយឡែក​កាលពីឆ្នាំមុន អេក្រង់ LED ដ៏ធំដែលព្យួរពីលើពិដាននៃ​ហាង Hong Kong Coliseum បាន​ធ្លាក់​មកលើក្រុមអ្នក​រាំ​អំឡុងពេលការប្រគុំតន្ត្រីរបស់ក្រុម Mirror បណ្តាល​ឲ្យ​បុរស​ពីរ​នាក់​រង​របួស​ធ្ងន់​ផងដែរ៕

ប្រែសម្រួល៖ សាង ស្រីល័ក្ខ

ចុចអាន៖Son Ye Jin បង្ហាញទម្លាប់ពេលព្រឹកខុសពីមុនឆ្ងាយ ក្រោយមានកូនប្រុសដំបូង

ចុចអាន៖Song Hye Kyo សរសេរសំបុត្រអរគុណទស្សនិកជនគាំទ្ររឿង “The Glory” លើសការរំពឹងទុក