Hong Suk Chun ដាស់តឿនប្រជាជនកូរ៉េកុំរួមភេទផ្ដេសផ្ដាស ដោយសារ Mpox កំពុងវាយលុក

តារាសម្ដែងប្រុស លោក Hong Seok Chun បានដាស់តឿនសាធារណជនក្នុងប្រទេសកូរ៉េខាងត្បូងឲ្យមានការប្រុងប្រយ័ត្ន ជាពិសេសទាក់ទងនឹងការរួមភេទផ្ដេសផ្ដាស ដោយសារតែមេរោគ Mpox (ពីមុនត្រូវបានគេស្គាល់ថាជាជំងឺអុតស្វា) បានរីករាលដាលជាសកល។

កាលពីថ្ងៃទី ២៤ ខែសីហា ដោយយោងតាមការចុះផ្សាយពី Yonhap បញ្ចាក់ថា តារាសម្តែងកូរ៉េខាងត្បូង និងជាបុគ្គលិកទូរទស្សន៍ទូរទស្សន៍ដ៏ពេញនិយម បានចែករំលែកអត្ថបទព័ត៌មាននៅលើប្រព័ន្ធផ្សព្វផ្សាយសង្គមរបស់គាត់​ អំពីការព្រួយបារម្ភអំពីការកើនឡើងនៃករណី Mpox សូមឲ្យមនុស្សគ្រប់គ្នាមេត្តាប្រុងប្រយ័ត្ន ខណៈដែលជំងឺកាចសាហាវមួយនេះ វាបានរីករាលដាលយ៉ាងឆាប់រហ័ស ទាំងអាហ្វ្រិក អឺរ៉ុប អាស៊ីអាគ្នេយ៍ សហរដ្ឋអាមេរិក និងថៃ។

លោកបានព្រមានជាពិសេសថា «​សូមប្រយ័ត្ន! ហើយត្រូវប្រាកដថាអនុវត្តការរួមភេទប្រកបដោយសុវត្ថិភាព។ ខ្ញុំបន្តនិយាយនេះម្តងហើយម្តងទៀត ​ដោយសារខ្ញុំមានហេតុផល។ សូមប្រយ័ត្នបំផុតនៅពេលធ្វើដំណើរទៅក្រៅប្រទេស​ជាមួយនឹងថ្ងៃឈប់សម្រាកនេះ ចំនួនករណីនៅក្នុងប្រទេសកូរ៉េខាងត្បូង ទំនងជានឹងកើនឡើងក្នុងពេលឆាប់ៗនេះ»​។

មិនត្រឹមតែប៉ុណ្ណឹងទេ តារាសម្ដែងវ័យ ៥៣ឆ្នាំបាននិយាយបន្ថែមទៀតថា “អ្នកដើរតាមខ្ញុំ ជាពិសេសកូនៗរបស់ខ្ញុំ សូមចងចាំរឿងនេះ​​ វាគ្រាន់តែជាការចាប់ផ្តើមប៉ុណ្ណោះ។ ការការពារគឺជាគន្លឹះ​ គ្មានថ្នាំ ឬស្រោមអនាម័យ។ ខ្ញុំគិតថា ខ្ញុំត្រូវតែនាំមុខនៅទីនេះ។

គួរបញ្ចាក់ដែរថា Mpox ដើមឡើយជាជំងឺឆ្លងនៅក្នុងទ្វីបអាហ្រ្វិក ប៉ុន្តែចាប់តាំងពីខែឧសភា ឆ្នាំ ២០២២ វាបានរីករាលដាលពាសពេញពិភពលោក ដោយករណីភាគច្រើនត្រូវបានរាយការណ៍នៅអឺរ៉ុប និងអាមេរិកខាងជើង។​ ចំពោះរោគសញ្ញាដំបូងរបស់ជំងឺនេះរួមមាន គ្រុនក្តៅ ឈឺក្បាល ឈឺសាច់ដុំ ឈឺខ្នង ហើមកូនកណ្តុរ គ្រុនញាក់ និងគ្មានកម្លាំងក្នុងខ្លួន ហើយកើតដំបៅស្បែកជាដើម៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖តារាសម្ដែង William តាមពិត មានប្រវត្តិគ្រួសារជាមហាសេដ្ឋីអចលនទ្រព្យហុងកុង