ពេជ្រ ចរណៃ ថា សំណាង! ដូចមានអ្វីម្យ៉ាងមកជួយបាំង កុំអីគេចមិនផុតពីផ្លៃដាវ

តារាសម្តែងកញ្ញា ពេជ្រ ចរណៃ បានប្រាប់កម្ពុជាថ្មីឲ្យដឹងពីហេតុការណ៍កាលពីប៉ុន្មានមុនថា ខ្លួនពិតជាសំណាងដែលអាចគេចផុត ពីគ្រោះថ្នាក់ពេលកំពុងហាត់ក្បាច់គុនស្នៀតដាវ ខណ:ដែលភ្នាត់ស្នៀតរបូតផ្លៃដាវសំដៅមករកខ្លួន។

កញ្ញា ពេជ្រ ចរណៃ ថា “ថ្ងៃនោះខ្ញុំសំណាងណាស់ កុំអីបើមិនចុងក្បាលក៏ត្រូវខ្នងដែរ ព្រោះរាល់ដងពេលខ្ញុំនៅខាងមុខពួកគាត់ពេលធ្វើក្បាច់ឲ្យមើល ភាគច្រើនគឺខ្ញុំបែរខ្នងអ៊ីងចឹងពេលហ្នឹងបើខ្ញុំបែរខ្នងមែនមិនត្រូវបញ្ជ្រាស់ជាមួយពួកគាត់ទេគឺត្រូវស្របទិសជាមួយពួកគាត់ អ៊ីចឹងបើសិនជាស្របគ្នាខ្ញុំប្រហែលត្រូវមួយផ្លៃដាវនេះតែម្តង”។

កញ្ញា ពេជ្រ ចរណៃបាននិយាយទៀតថា ដូចមានអ្វីម្យ៉ាងថែរក្សាទើបបានជាផ្លៃដាវខ្វៀងបញ្ឆិតទៅម្ខាងទើបនាងចៀសផុតពីគ្រោះថ្នាក់ថ្ងៃនោះ។ នាងថា កន្លងមកខ្លួនកម្ររបង្ហាត់ទល់មុខបែបនេះណាស់ ព្រោះពេលខ្លះនាំឲ្យពួកគាត់ពិបាកក្នុងការមើលឬហាត់តាម។

គួរបញ្ជាក់ថា កាលពីថ្មីៗនេះ អ្នកគាំទ្រមានការភ្ញាក់ផ្អើលនិងស្រៀវខ្លួនគ្រប់ៗគ្នា បន្ទាប់ទស្សនាវីដេអូនៃការហាត់គុនដាវពីសំណាក់តារាសម្តែងនិងជាគ្រូគុនល្បុក្កតោកញ្ញា ពេជ្រ ចរណៃ ដែលមានកាភ្លាត់ស្នៀតរបូតផ្លែដាវចេញពីដង ប៊ិះបង្កគ្រោះថ្នាក់ពេលកំពុងហ្វឹកហាត់។

បើតាមរយ:វីដេអូជិតមួយនាទីដែលត្រូវបានចែករំលែ កនៅលើបណ្តាញសង្គមគឺគេឃើញតារាស្រី ពេជ្រ ចរ ណៃ ដែលជាគ្រូបានបញ្ចេញក្បាច់នៃកាហាត់រៀនស្នាតផ្លែដាវ (ដាវពិត)ជាមួយក្រុមការងារដោយមានភាពស្វាហាប់ប៉ុន្តែអ្វីដែលធ្វើឲ្យមានការចាប់អារម្មណ៍នោះស្រាប់តែពេលកំពុងហាត់ក៏របូតផ្លែដាវចេញពីដង សំដៅមកក្បែរនាងតែសំណាងល្អមិនបណ្តាលឲ្យគ្រោះថ្នាក់។

ជឿជាក់ថា អ្នកគាំទ្រប្រាកដជាស្គាល់ហើយថាក្រៅពីអាជីពជាអ្នកសម្តែង ពេជ្រ ចរណៃ ក៏ជាគ្រូបង្ហាត់ក្បាច់គុនល្បុក្កតោដ៏ល្បីឈ្មោះម្នាក់ដែរ និងតែចូលរួមបង្ហាញស្នាដៃក្នុងកម្មវិធីធំៗមួយចំនួនទាំងក្នុងនិងក្រៅប្រទេសផងដែរ។ អ្វីដែលគួរឱ្យកត់សម្គាល់ នៅថ្ងៃនេះ កញ្ញា ពេជ្រ ចរណៃ ក៏បានចូលរួមប្រកួតព្រឹត្តិការណ៍កីឡាយុទ្ធគុនចម្រុះខ្មែរបុរាណ “ពានរង្វាន់សម្តេចធិបតី” ផងដែរ៕ អត្ថបទ៖ ចាន់រ៉ា