ពេជ្រ ចរណៃ គ្រោងសម្តែងគុនល្បុក្កតោ ២៥ខេត្ត-ក្រុង ក្រោមមូលនិធិ ម្នាក់ ១ដុល្លារ ដើម្បីវីរកងទ័ពជួរមុខ និងពលរដ្ឋភៀសសឹក

កញ្ញា ពេជ្រ ចរណៃ តារាសម្តែង និងជាគ្រូល្បុក្កតោ គ្រោងធ្វើបេសកកម្មមនុស្សធម៌មួយទៀត ក្នុងការស្វែងរកមូលនិធិជួយដល់វីរកងទ័ពជួរមុខ ក៏ដូចជាពលរដ្ឋភៀសសឹកកម្ពុជា។ នេះបើតាមការបញ្ជាក់ពីទំព័រហ្វេសប៊ុកផ្លូវការ ពេជ្រ ចរណៃ ល្បុក្កតោខ្មែរ៚ កាលពីថ្ងៃទី ២៥ ខែកញ្ញា ឆ្នាំ២០២៥។

កញ្ញា ពេជ្រ ចរណៃ បានឱ្យដឹងថា ឆាប់ៗនេះ ខ្លួននឹងធ្វើបេសកកម្មមួយដើម្បីប្រមូលថវិកាជួយដល់វីរកងទ័ពជួរមុខ ក៏ដូចជាពលរដ្ឋភៀសសឹកកម្ពុជា តាមរយៈការសម្តែងក្បាច់គុនល្បុក្កតោ ទូទាំងខេត្ត-ក្រុងទាំង២៥ នៃព្រះរាជាណាចក្រកម្ពុជា ក្រោម”មូលនិធិ ម្នាក់ ១ដុល្លារ ដើម្បីជួយដល់វីរកងទ័ពជួរមុខ និង ជួយដល់ជនភៀសសឹក“។

ទន្ទឹមនេះ កញ្ញា ពេជ្រ ចរណៃ ក៏បានអំពាវនាវដល់សប្បុរសជននានាចូលរួមជាមួយមូលនិធិនេះ ក្នុងន័យដើម្បីជាចំណែកជួយដល់ប្រទេសជាតិយើងទាំងអស់គ្នា។

គួររំលឹកដែរថា គំនិតផ្តួចផ្តើមនៃមូលនិធិខាងលើនេះ គឺធ្វើឡើងក្រោយមូលនិធិ “១ដុល្លារ សម្រាប់វីរជន ដើម្បីទិញដ្រូនបំពាក់កាមេរ៉ាចាប់កម្ដៅ” កាលពីអំឡុងពាក់កណ្តាលខែសីហាកន្លងទៅ ៕