លោក លៀក លីដា លើកទឹកចិត្តអ្នកនាង អុឹម សុគន្ធា រកការដោះស្រាយប្រកបដោយប្រាជ្ញា និងប្រុងប្រយ័ត្ន

ផលិតករនិងជាអ្នកដឹកនាំសម្តែងលោក លៀក លីដា បានចេញមកលើកទឹកចិត្ត និងបង្ហាញការចូលរួមសោកស្តាយបន្ទាប់ពីកម្មវិធី Miss Grand International 2024 ត្រូវបានផ្តាច់សិទ្ធិកម្ពុជាធ្វើជាម្ចាស់ផ្ទះយ៉ាងតក់ក្រហល់បំផុត។

ជាមួយនោះដែរលោក លៀក លីដា បានលើកទឹកចិត្តដល់អ្នកនាង អុឹម សុគន្ធា អគ្គនាយិកានិងជាអ្នកគ្រប់គ្រងកម្មវិធី Miss Grand Cambodia ព្រមទាំងស្វាមី គួររកមធ្យោបាយដោះស្រាយប្រកបដោយប្រាជ្ញានិងការប្រុងប្រយ័ត្នបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផលិតករលោក លៀក លីដា បានបញ្ចេញខ្លឹមសារថា ក្នុងនាមលោកជាប្រជាពលរដ្ឋខ្មែរ ហើយក្នុងនាមលោកជាអ្នកធ្វើការនៅក្នុងវិស័យសិល្បៈ និងវិស័យភាពយន្ត លោកសូមចូលរួមសោកស្ដាយចំពោះអ្នករៀបកម្មវិធី Miss Grand Cambodia ដែលបានទទួលការងាររៀបចំ Miss Grand International ។ ទន្ទឹមនេះ លោកលើកទឹកចិត្តអ្នកនាង អុឹម សុគន្ធា និងស្វាមី រកមធ្យោបាយដោះស្រាយប្រកបដោយប្រាជ្ញា និងការប្រុងប្រយ័ត្ន។

មកដល់ពេលនេះអ្នកនាង អុឹម សុគន្ធា នៅតែបង្ហាញការខកចិត្តជាខ្លាំងចំពោះការមើលងាយមិនឲ្យតម្លៃពីសំណាក់ភាគីអ្នកគ្រប់គ្រងថៃ មកលើក្រុមការងាររបស់នាង និងប្រជាជនកម្ពុជា ដែលបានខិតខំអស់ពីកម្លាំងចិត្ត។

ទោះបីជាយ៉ាងណាអ្នកនាង ក៏បានប្រកាសនឹងរៀបចំធ្វើសន្និសិតសារព័ត៌មាន នៅថ្ងៃទី០៩ ខែតុលា ឆ្នាំ២០២៤ ស្អែកនេះ ដើម្បីបកស្រាយលម្អិតទាក់ទងនឹងរឿងរ៉ាវដែលបានកើតឡើងកន្លងមក រវាងក្រុមការងាររៀបចំរបស់កម្ពុជាជាមួយលោក ណាវ៉ាត់ ផងដែរ៕ អត្ថបទ៖ ចាន់រ៉ា