នាង ដាវីន ៖ ចង់ឱ្យវិស័យសិល្បៈរីកចម្រើន ចុះហេតុអី្វទាញទីផ្សារទម្លាក់ចុះ?

តារាចម្រៀងវ័យក្មេង និងជាអតីតបេក្ខភាពកម្មវិធីប្រឡង Cambodian Idol រដូវកាលទី៤ លោក នាង ដាវីន បានចេញសារដាស់តឿននិងដាក់ចំៗរឿងអ្នករៀបចំកម្មវិធីតន្ត្រីមួយចំនួន ទាញតម្លៃទម្លាក់ចុះនូវតម្លៃខ្លួនអ្នកសិល្ប: មិនថារូបលោកឬតារាដទៃទៀត។

ការលើកឡើងរបស់តារាប្រុសតរូបនេះ ដោយសារលោកហាក់មានការអន់ចិត្ត និងអស់នូវភាពអត់ធ្មត់ ខណ:កន្លងមកតែងកើតមានរឿងរ៉ាវបែបនេះច្រើនមកហើយ ចំពោះអ្នកសិល្ប:ស្រុកខ្មែរ។ នាង ដាវីន បាននិយាយដោយមិនខ្លាចបាត់បង់ប្រជាប្រិយភាព ឬទីផ្សារច្រៀងដូច្នេះថា សារដាស់តឿនទៅកាន់បងប្អូនសិល្ប:ទាំងអស់ ។

តារាចម្រៀង នាង ដាវីន បាននិយាយបន្តថា “ចង់ឱ្យវិស័យសិល្បៈរីកចម្រើន? ចុះហេតុអី្វទាញទីផ្សារពួកខ្ញុំទម្លាក់ចុះហើយប្រើភាសារជួយបងម្តង តែជួយយូទៅដូចអត់ឡើងលើសោះ គឺមានតែទាញចុះក្រោមរហូត ហើយទៅដើរនិយាយថាចេះចុះធ្វើអ៊ីចឹងដើម្បីអី្វ?”។

លោកបន្តថា អ្នកចង់ចំណេញចុះហេតុអី្វមិនឱ្យពួកខ្ញុំចំណេញខ្លះវិញ? ឱវិស័យសិល្បៈខ្ញុំអើយ ថ្ងៃមុខទៅជាយ៉ាងណា បើនៅតែបែបនេះរឿងនេះ វាយូរហើយតែគ្មានអ្នកណាហ៊ានព្រោះខ្លាចគេបិទទីផ្សារ អ៊ីចឹងទុកខ្ញុំអ្នកនិយាយអ៊ីចឹង។

បន្ថែមពីនេះ នាង ដាវីន បានលើកឡើងថា សូមផ្តាំទៅបងៗប្អូនៗអ្នកចម្រៀងទាំងអស់ថា បើនៅតែធ្វើបែបនោះអ្នកដែលខាតគឺជាអ្នក បើគេមិនចំណេញគេមិនធ្វើទេត្រូវចាំ ស្អប់លោកក៏ស្អប់ចុះពាក្យពិតរាងពិបាកទទួលយកបន្តិចតែក៏អាចជួយគេបានច្រើនលោកក៏សប្បាយចិត្ត៕ អត្ថបទ៖ ចាន់រ៉ា