Wendy និង Yeri លើកដៃបាយៗក្រុម Red Velvet និង SM ជាផ្លូវការហើយ

នៅក្នុងសេចក្តីថ្លែងការណ៍មួយដែលបានចែករំលែកនៅលើគណនីប្រព័ន្ធផ្សព្វផ្សាយសង្គមផ្លូវការរបស់ផលិតកម្ម SM Entertainment បានប្រកាសពីការចាកចេញរបស់ Yeri និង Wendy សមាជិកក្រុម Red Velvet ថា អ្នកទាំងពីរបានសម្រេចមិនបន្តកុងត្រាជាមួយក្រុមហ៊ុនទេ។

តាមរយៈសារដ៏វែងអន្លាយនោះ ផលិតកម្ម SM បានប្រកាសថា កិច្ចសន្យាផ្តាច់មុខជាមួយសមាជិកក្រុម Red Velvet គឺ Wendy (Son Seung-wan) និង Yeri (Kim Ye-rim) ត្រូវបានបញ្ចប់ជាស្ថាពរហើយ។ ទោះយ៉ាងណា នៅក្នុងការផ្លាស់ប្តូរដែលធ្វើឲ្យមនុស្សជាច្រើនភ្ញាក់ផ្អើល ទាំង Yeri និង Wendy នឹងនៅតែបន្តសកម្មភាពក្រុមដដែល ទោះបីជាកិច្ចសន្យារបស់ពួកគេផុតកំណត់ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះ SM បានបញ្ចាក់ទៀតថា «ចាប់តាំងពីការបង្ហាញខ្លួនជាលើកដំបូងរបស់ពួកគេជាផ្នែកមួយនៃក្រុម Red Velvet ទាំង Wendy និង Yeri បានធ្វើការផ្សព្វផ្សាយយ៉ាងសកម្មទាំងជាផ្នែកមួយនៃក្រុម និងក្នុងនាមជាអ្នកចម្រៀងទោលនៅក្នុងវិស័យផ្សេងៗរបស់ពួកគេ គឺជាសេចក្តីរីករាយដ៏អស្ចារ្យបំផុត។ ពួកយើង​មាន​សុភមង្គល​ច្រើន​ណាស់ ​ក្នុង​អំឡុង​ពេល​ដែលនៅ​ជាមួយ​គ្នា។ ដូច្នេះ ភ្នាក់ងារសូមលើកទឹកចិត្តតារាស្រីទាំងពីរ ក្នុងការចាប់ផ្តើមជីវិតថ្មីក្នុងវិថីសិល្បៈ ហើយជាពិសេសសូមនៅតែបន្តគាំទ្រពួកគេ ចំពោះការខិតខំប្រឹងប្រែងនាពេលអនាគតរបស់សមាជិកទាំងពីរ»។

ដំណឹងនេះផងដែរ ក៏ជាជំពូកថ្មីមួយសម្រាប់ Yeri និង Wendy ដែលត្រូវបានគេរំពឹងថា នឹងបន្តការខិតខំប្រឹងប្រែងក្នុងនាមជាអ្នកចម្រៀងទោល ខណៈពេលដែលអ្នកទាំងពីរនៅតែរក្សាវត្តមាននៅក្នុងសកម្មភាពនាពេលខាងមុខរបស់ Red Velvet ។ ឥឡូវនេះ អ្នកគាំទ្រកំពុងតាមដានយ៉ាងដិតដល់ ដើម្បីមើលថា តើអ្វីជាជំហានដ៏ក្លាហាន និងច្នៃប្រឌិតដែលសមាជិក២រូបនេះ នឹងធ្វើបន្ទាប់ទៀត។

សូមជម្រាបជូនដែរថា Red Velvet បាន​បង្ហាញ​ខ្លួន​ដំបូង​ក្នុង​ឆ្នាំ ២០១៤ ជា​ក្រុម​ចម្រៀង​ស្រី​ល្បី​បំផុត​មួយ​របស់ K-pop ដែល​មាន​បទ​ល្បី​ដូច​ជា «Ice Cream Cake, Russian Roulette, Peek-A-Boo និង Red Flavor» ខណៈពេលដែលការផ្លាស់ប្តូរនៅក្នុងកិច្ចសន្យាបុគ្គលជារឿយៗ ធ្វើឲ្យមានការព្រួយបារម្ភអំពីការរំសាយក្រុម បើទោះជាសេចក្តីថ្លែងការណ៍របស់ SM បានធានាដល់អ្នកគាំទ្រថា Red Velvet នៅតែបន្តទៅមុខយ៉ាងណាក្ដី។ មិនតែប៉ុណ្ណោះ ចាប់តាំងពីឆ្នាំ ២០២៣ មក សមាជិកក្រុមដែលនៅសល់រួមមាន៖ Seulgi, Irene និង Joy បានបន្តកិច្ចសន្យារបស់ពួកគេ នៅខែសីហា ឆ្នាំ ២០២៣ ខែកុម្ភៈ ឆ្នាំ ២០២៤ រហូតដល់ខែមករា ឆ្នាំ ២០២៥ រៀងៗគ្នា៕

អត្ថបទ៖ សាង ស្រីល័ក្ខ

ចុចអាន៖ភ្នាក់ងារ Seo Ye Ji ប្រកាសដាច់អហង្ការ ដាក់ពាក្យបណ្ដឹងព្រហ្មទណ្ឌ ប្រឆាំងបុគ្គលផ្សាយព័ត៌មានមិនពិត