ព្រឹកនេះ ខេមរៈ សិរីមន្ដ ធ្វើពិធីក្រុងពាលីនៅប្រាសាទអង្គរវត្ត ត្រៀមថត MV បទ«មនសិការជាតិខ្មែរ»

ព្រឹកថ្ងៃទី១៦ ខែកក្កដានេះ កំពូលតារាចម្រៀងជួរមុខរបស់ប្រទេសកម្ពុជា ឧកញ៉ា ខេមរៈ សិរីមន្ដ និងក្រុមការងារ បានរៀបចំធ្វើពិធីក្រុងពាលីនៅប្រាសាទអង្គរវត្ត សម្រាប់ការតៀមថត MV ថ្មី បទ «មនសិកាជាតិខ្មែរ» ។

បើតាមការបញ្ជាក់ឱ្យដឹង កាលពីរសៀលម្សិលមិញនេះ តារាចម្រៀង ខេមរ: សិរីមន្ត បានបញ្ជាក់ឱ្យដឹងថា សម្រាប់ការធ្វើពិធីក្រុងពាលីនៅប្រាសាទអង្គរវត្ត គឺបង្ហាញពីស្មារតីសាមគ្គីរួមគ្នាជាធ្លុងតែមួយ ដើម្បីលើកទឹកចិត្តដល់វីរកងទ័ពរបស់កម្ពុជា ដែលកំពុងឈរជើងការពារបូរណភាពទឹកដីដ៏អង់អាចក្លាហាន នៅតាមបន្ទាត់ព្រំដែនកម្ពុជា-ថៃ។

មិនតែប៉ុណ្ណោះ គឺដើម្បីបួងសួងដល់បុព្វបុរសគ្រប់ជំនាន់ និងវត្ថុស័ក្ដិសិទ្ធិទាំងអស់ ជួយដល់កងទ័ពកម្ពុជាឈ្នះអស់មារសត្រូវ ព្រមនិងសុំសុខសួស្តីដល់ការថត MV ថ្មី បទ «មនសិកាជាតិខ្មែរ» ផងដែរ។

គួរជម្រាបថា ក្រោយការប៉ះទង្គិចគ្នារវាងទាហានកម្ពុជា និងទាហានថៃ កាលព្រឹកថ្ងៃទី ២៨ខែឧសភា ឆ្នាំ២០២៥ ស្ថិតនៅចំណុចភូមិតេជោមរកត ឃុំមរកតស្រុកជាំក្សាន្តខេត្តព្រះវិហារ មិនមែនតែប្រជាពលរដ្ឋកម្ពុជានោះទេ បណ្តាអ្នកក្នុងចង្កោមសិល្បៈ បានបង្ហាញការយកចិត្តទុកដាក់យ៉ាងខ្លាំង តាមរយៈការផ្តល់កកម្លាំងចិត្ត ក៏ដូចជាឧបត្ថម្ភជំនួយជួយដល់កងទ័ពជួរមុខ និងសកម្មភាពជាច្រើនទៀត។

តួយ៉ាង តារាប្រុសស្រីប្រចាំផលិតកម្ម Galaxy បានចេញសកម្មភាពជាច្រើន ចូលរួមលើកទឹកចិត្តកងទ័ពកម្ពុជាដ៏អង់អាច ដោយបង្កើតកម្មវិធីសប្បុរសនានា និងជួបផ្ទាល់ជាមួយកងទ័ពតាមតំបន់។ ជាមួយនឹងស្មារតីរួមគ្នានេះ កំពូលតារាចម្រៀង ខេមរៈ សិរីមន្ត្ត ក៏ត្រៀមចម្រៀងថ្មីដែលអានត្រឹមចំណងជើង មានន័យដូចកំពុងបង្ហាញភក្តីចំពោះជាតិមាតុភូមិ។ សកម្មភាពនេះដែរ ក៏ត្រូវបានមហាជន ពិសេសអ្នកគាំទ្រតារាចម្រៀងប្រុសរូបនេះ បង្ហាញការពេញចិត្តនិងស្ញប់ស្ញែងផងដែរ៕ ចាន់រ៉ា