ម្ចាស់បទ “ស្អាតជានិច្ច” លោកគ្រូ ងិន សុខគ្រវ៉ារ ទទួលមរណភាពនៅព្រឹកថ្ងៃនេះ

នេះជាដំណឹងដ៏ក្តុកក្តួល និងសោកសៅបំផុត ខណ:គ្រូផ្នែកចម្រៀងអប់រំកុមារ លោកគ្រូ ងិន សុខគ្រវ៉ារ បានទទួលមរណភាពក្នុងអាយុ ៧៣ឆ្នាំ នៅព្រឹកថ្ងៃទី២៣ ខែសីហានេះ។

បើតាមការបញ្ជាក់ឲ្យដឹងរបស់ក្រុមព្រះសុរិយា លោកគ្រូ ងិន សុខគ្រវ៉ារ គឺជាវីរៈសិល្បករតែងនិពន្ធទំនុកច្រៀង និងបទភ្លេង និងជាកូនសិស្សរបស់​វីរៈសិល្បករ ម៉ៅ វិណ្ណា​ អធិរាជតែងនិពន្ធបទភ្លេង និងទំនុកច្រៀងចម្រៀងអប់រំកុមារ។

លោក ងិន សុខគ្រវ៉ារ​ ក៏ជាទីប្រឹក្សាក្រសួងព័ត៌មាន និងជាម្ចាស់សាលាតន្ត្រី សុខគ្រវ៉ារ ដែលមិនសូវមានអ្នកបានដឹងថា លោកជាម្ចាស់បទ “ស្អាតជានិច្ច” ដែលលោកនិពន្ធក្រោយថ្ងៃជ័យជំនះ៧ មករា ​ឆ្នាំ១៩៧៩​ កំឡុងពេលដែលបម្រើការនៅមជ្ឈមណ្ឌលកុមារកំព្រា កុលាបទី១​ ។

សូមជម្រាបថាចន្លោះឆ្នាំ១៩៧៩-១៩៩២ លោកងិន សុខគ្រវ៉ារ បាននិពន្ធបទចម្រៀងកុមារចំនួន១២០បទ និង បានយកទៅថតនិងចាក់ផ្សាយនៅវិទ្យុជាតិ។ បចម្រៀងទាំងអស់សុទ្ធសឹងជាបទមានអត្ថន័យបែប ស្នេហា ជាតិ គោរពមាតាបិតា សុជីវធម៌ គោរពវិន័យ និង ការដឹងគុណមាតាបិតាជាដើម។

ក្នុងចំណោមបទទាំង១២០បទ ក្នុងនោះបទ «ស្អាតជា និច្ច» គឺជាបទដែលល្បីឮមកដល់សព្វថ្ងៃ។ លោកបាននិពន្ធបទនេះនៅក្នុងឆ្នាំ១៩៧៩ និងបានយកទៅថតផ្សាយនៅវិទ្យុជាតិ ក្នុងឆ្នាំ​១៩៨២ ។ ការថតបទនេះ កូនសិស្សរបស់លោកជាអ្នកច្រៀង ឯតន្ត្រីករនៅវិទ្យុជាតិជាអ្នកប្រគំភ្លេង។ បទ «ស្អាតជានិច្ច» ជាបទមួយខ្លីសម្រាប់កុមារវាមានអត្ថន័យសាមញ្ញបំផុតក្នុងការអប់រំកុមារឱ្យមានអនាម័យ ខំរៀនសូត្រ និង ចេះថែរក្សាសុខភាព ៕ ចាន់រ៉ា