លោក អុិន វិចិត្រ អះអាងថា លោកទទួលរាល់មតិរិះគន់ស្ថាបនា និងអាចជជែកផ្ទាល់ ដើម្បីរួមអភិវឌ្ឍវិស័យភាពយន្តខ្មែរ

លោក អុិន វិចិត្រ ចាងហ្វាងផលិតកម្ម Mediaload Pictures បានស្នើដល់មហាជនដែលបានទស្សនាភាពយន្តផលិតកម្មរបស់លោក ហើយមើលឃើញភាពឆ្គាំឆ្គងណាមួយក្នុងភាពយន្ត អាចផ្តល់ជាមតិរិះគន់ស្ថាបនាទៅកាន់លោកដោយផ្ទាល់ ដើម្បីផ្តល់ឱកាសឱ្យលោកបានកែតម្រូវ ក៏ដូចជាជំរុញឱ្យកុនខ្មែរមានភាពប្រសើរឡើង។

ការសំណូមពរនេះ គឺក្រោយថ្មីៗនេះ មានការរិះគន់និងវាយតម្លៃហួសហេតុលើភាពយន្តមួយផលិតកម្មខ្លួន ជាហេតុធ្វើឱ្យលោក ចេញមកសម្តែងការហួសចិត្ត និងមិនពេញចិត្តជាខ្លាំង។

យ៉ាងណា ក្រោយស្ងប់នៃការរិះគន់មួយរយៈ ចាងហ្វាងផលិតកម្មរូបនេះ បានចេញមកសំណូមពរដូច្នេះ “បងប្អូនដែលមានមតិរិះគន់ចង់កែលំអរភាពយន្តខ្ញុំ អាចទាក់ទងខ្ញុំផ្ទាល់ ហើយជជែកជាមួយគ្នា ដើម្បីអភិវឌ្ឍវិស័យនេះទៅជាមួយគ្នា។ ខ្ញុំបើកចិត្តទទួលទាំងអស់គ្នា” ។

លោក អុិន វិចិត្រ ត្រូវបានគេស្គាល់ថា ជាផលិតករភាពយន្តវ័យក្មេងរបស់ខ្មែរម្នាក់ ដែលមានបទពិសោធនិងស្នាដៃច្រើន ក្នុងការផលិតរឿងបែបកំប្លុកកំប្លែងភ័យរន្ធត់ ខណ:ថ្មីៗ ភាពយន្តរបស់លោក ទើបតែបានចាក់បញ្ចាំងនៅតាមបណ្តារោងកុនក្នុងស្រុកមួយចំនួន៕