បារមី ត្រៀមបញ្ចេញតារាល្បីៗរបស់ខ្លួនជួយផ្សព្វផ្សាយផលិតផលខ្មែរឥតគិតថ្លៃ

ផលិតកម្ម”បារមី”ដែលមានតារាចម្រៀងប្រុសស្រីល្បីៗពេញនិយម បានប្រកាសនូវឆន្ទ:ក្នុងការរួមចំណែកដើម្បីជួយផ្សព្វផ្សាយផលិតផលខ្មែរដោយ ឥតគិតថ្លៃសម្រាប់តម្រូវការក្នុងស្រុករបស់ប្រជាជនយើង។

ផលិតកម្មបារមី បញ្ជាក់ថា ការប្រកាសនេះគឺបន្ទាប់ពីកន្លងពេលថ្មីៗមកនេះពួកយើងបានទទួលសារសំណូមពរជាច្រើនពីអាជីវកម្មក្នុងស្រុកមួយចំនួនដែលកំពុងបង្កើតផលិតផលខ្មែរសម្រាប់តម្រូវការក្នុងស្រុករបស់ប្រជាជនកម្ពុជាយើង។

ផលិតកម្ម”បារមី” បានបន្តឲ្យដឹងទៀតថា សកម្មភាពទាំងនេះបានបំផុសគំនិតពួកយើងយ៉ាងខ្លាំង ហើយផលិតកម្មបារមីពិតជាចង់ស្វែងរកវិធីដើម្បីជួយផ្សព្វផ្សាយនិងចែករំលែកផលិតផលម៉ាកយីហោរបស់ខ្មែរក្នុងគ្រាដ៏លំបាកនេះ “ជាជំហានដំបូងពួកយើងកំពុងចាប់ផ្តើមគម្រោងនេះតាមរយៈការសិក្សានិងស្វែងយល់ ពីសហគមន៍ឱ្យបានកាន់តែច្បាស់និងពិនិត្យមើលថា តើយើងអាចជួយផ្សព្វផ្សាយផលិតផលខ្មែរបានយ៉ាងដូចម្តេចខ្លះ”។

បន្ថែមពីនេះផលិតកម្ម”បារមី” បានឲ្យដឹងដែរថា ប្រសិនបើម្ចាស់អាជីវកម្ម ឬម៉ាកយីហោខ្មែរណាមួយដែលទើបនឹងបង្កើតថ្មី ក៏អាចចែករំលែកព័ត៌មានផលិតផលរបស់ខ្លួនមកកាន់បារមីផងដែរ តាមរយៈ [email protected]។

ទន្ទឹមគ្នានឹងការគាំទ្រ ក៏មានការសំណូមពរដែរថា “រឿងនេះពិតជាល្អណាស់តែមុនផ្សព្វផ្សាយ សូមជួយត្រួតពិនិត្យគុណភាពផលិតជាមុនផងដើម្បីអោយប្រជាជ នប្រើដោយមានទំនុកចិត្តខ្ពស់ជៀសវាងបញ្ហារទៅថ្ងៃមុខ (ព្រោះអ្វីៗ ក៏ដោយអោយតែមានការផ្សព្វដឹងតែគាំទ្រហើយ) ខ្ញុំគាំទ្រផលិតផលខ្មែរ”។

គួររម្លឹកថាកាលពីថ្មីៗកន្លងទៅសម្តេចអគ្គមហាសេនា បតីតេជោហ៊ុន សែន បានមានប្រសាសន៍អំពាវនាវឲ្យជនរួមជាតិខ្មែរនាំគ្នាប្រើប្រាស់ផលិតផលដែលខ្មែរមាន ! ជាតិនិយមរបស់ខ្មែរ !។ ម្យ៉ាងទៀតរាជរដ្ឋាភិបានក៏បានបិទការនាំចូលទំនិញដូចជា បន្លែ ផ្លែឈើ និងផលិតផលមួយចំនួនពីប្រទេសថៃផងដែរ៕ ចាន់រ៉ា