សាកសព​ចំណាប់ខ្មាំង​ថៃ​ម្នាក់ នឹង​ត្រូវ​ហាម៉ាស​ប្រគល់​ឲ្យ​វិញ​ ក្រោម​បទ​ឈប់បាញ់​ថ្មី

យោង​តាម​ការ​ចុះផ្សាយ​របស់​កាសែត​​បាងកក​ប៉ុស្តិ៍ ជនជាតិថៃម្នាក់ដែល​ត្រូវបានគេអះអាងថាបានស្លាប់ក្នុងចំណោមចំណាប់ខ្មាំងចំនួន​៤៨​​នាក់ នឹង​ត្រូវបានដោះលែង ក្រោម​កិច្ចព្រមព្រៀងឈប់បាញ់រវាងអ៊ីស្រាអែល និងក្រុមហាម៉ាស។

ជន​រង​គ្រោះ​ត្រូវ​បាន​គេ​ស្គាល់​ឈ្មោះ​ថា Sudthisak Rinthalak អាយុ​៤៣​ឆ្នាំ ជា​កសិករ​ថៃ​មក​ពីខេត្ត Nong Khai ភាគ​ឦសាន​ប្រទេស​ថៃ ។ គាត់​បាន​ធ្វើ​ការ​លើ​ចំការ​នៅ​តំបន់ Beeri kibbutz ​ភាគ​ខាង​ត្បូង​ប្រទេស​អ៊ីស្រាអែល ពេល​ដែល​ក្រុម​ហាម៉ាស​បាន​បើក​ការ​វាយ​ប្រហារ​ទ្រង់ទ្រាយ​ធំ​របស់​ខ្លួន​នៅ​ថ្ងៃ​ទី៧ខែ​តុលាឆ្នាំ២០២៣។

អាជ្ញាធរ​អ៊ីស្រាអែល​បាន​បញ្ជាក់​ក្នុង​ខែ​ឧសភាឆ្នាំ​២០២៤ថា Sudthisak ត្រូវ​បាន​សម្លាប់​ក្នុង​អំឡុង​ពេល​ការ​វាយ​ប្រហារ ហើយ​សាកសព​របស់​គាត់​ត្រូវ​បាន​គេ​យក​ទៅ​កាន់​​តំបន់​ហ្គាហ្សា។

Sudthisak បានធ្វើការនៅក្នុងប្រទេសអ៊ីស្រាអែល តាំងពី​ឆ្នាំ២០១៧ ដែលជាផ្នែកមួយនៃកិច្ចព្រមព្រៀងការងារដ៏យូរអង្វែងរវាងប្រទេសទាំងពីរ ដែលអនុញ្ញាត​ឲ្យ​ជនជាតិថៃធ្វើការក្នុងវិស័យកសិកម្មរបស់អ៊ីស្រាអែល។

នៅក្រោមកិច្ចព្រមព្រៀងឈប់បាញ់បច្ចុប្បន្ន ចំណាប់ខ្មាំងចំនួន៤៨​នាក់នឹងត្រូវដោះលែង ទោះបីជា​ពួកគេប្រហែល២៨​នាក់ត្រូវគេជឿថាបានស្លាប់នៅក្នុងការជាប់ឃុំក៏ដោយ។

កាសែតបាងកកប៉ុស្តិ៍ បានរាយការណ៍ថា មន្ត្រីក្នុងតំបន់​នៃ​ខេត្ត Nong Khai បានទទួលដំណឹង ប៉ុន្តែមិនអាចបញ្ជាក់បានទេថានៅពេលណាដែលសាកសពនឹងត្រូវធ្វើមាតុភូមិនិវត្តន៍ទៅកាន់ប្រទេសថៃ។

ពលករថៃជាង ៣០​ ០០០​នាក់ ស្ថិតនៅក្នុងប្រទេសអ៊ីស្រាអែល មុនពេលសង្រ្គាមឆ្នាំ​២០២៣ បានចាប់ផ្តើម ដែលភាគច្រើននៃពួកគេធ្វើការនៅក្នុងសហគមន៍ព្រំដែនដែលស្ថិតនៅក្រោមការវាយប្រហាររបស់ក្រុមហាម៉ាស។ ចាប់តាំងពីពេលនោះមក រដ្ឋាភិបាលថៃបានសម្របសម្រួលជាមួយអាជ្ញាធរអ៊ីស្រាអែល ដើម្បីធ្វើមាតុភូមិនិវត្តន៍អ្នកនៅរស់រានមានជីវិត និងយកសាកសពអ្នកដែលត្រូវបានសម្លាប់៕

ដោយ៖ ឈាង