ថៃអះអាងទៀតហើយថា កម្ពុជារំលោភដីរបស់ខ្លួន ចុះហេតុអ្វីមិនព្រមប្តឹងតុលាការអន្តរជាតិ?

ម្តងហើយម្តងទៀត ភាគីថៃនៅតែនិយាយដដែលៗថា ខ្លួនគោរពច្បាប់អន្តរជាតិ ជាពិសេសស្ថានការណ៍តានតឹងចុងក្រោយបំផុតនៅឃុំអូរបីជាន់ ទឹកដីកម្ពុជា ប៉ុន្តែកងទ័ពថៃ បែរជាអះអាងទាំងងើលថា ទីនោះជាទឹកដីរបស់ខ្លួនទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃពុធទី១៥ខែតុលាឆ្នាំ២០២៥ អ្នកនាំពាក្យកងទ័ពថៃ Winthai Suvaree និយាយទាំងមិនខ្មាសមាត់ថា សកម្មភាពរបស់ថៃគឺធ្វើលើទឹកដីខ្លួន ហើយមកចោទថា កងទ័ពកម្ពុជាបង្កឲ្យមានឧបទ្ទវហេតុនៅតាមបណ្តោយព្រំដែនទៅវិញ។

តាមសេចក្តីរាយការណ៍របស់ The Nation, កងទ័ពថៃនិយាយទាំងមិនពិតថា កម្ពុជាព្យាយាមបញ្ជូនជនស៊ីវិលមានទាំងកុមារ ស្ត្រី មនុស្សចាស់ និងព្រះសង្ឃ ដែលមិនមែនជាអ្នករស់នៅក្នុងតំបន់រងផលប៉ះពាល់ពិតប្រាកដ ដើម្បីបង្កើតរូបភាពសម្រាប់ប្រព័ន្ធផ្សព្វផ្សាយអន្តរជាតិ។

លើសពីនេះ ថៃថា ការដាក់ប្រព័ន្ធបំពងសំឡេង គឺស្ថិតនៅក្នុងអធិបតេយ្យភាពរបស់ថៃ ហើយស្របតាមការអនុវត្តនៅក្នុងប្រទេសដទៃទៀត ដែលជាវិធានការ ការពារទុកជាមុនដែលមិនបង្កគ្រោះថ្នាក់ដល់ជីវិតដើម្បីកាត់បន្ថយហានិភ័យ ជាពិសេសប្រឆាំងអ្នកបំពានច្បាប់។ ថៃ ថា ឧបករណ៍ទាំងនោះគឺស្ថិតក្នុងដីថៃ ហើយការលុកលុយរបស់កម្ពុជា បង្កជាក្តីបារម្ភជាសាធារណៈ។

ដូច្នេះសុំសួរសំណួរទៅវិញថា បើថៃចោទខ្មែរនៅលើដីថៃ ចុះហេតុអ្វីមិនព្រមប្តឹងទៅអន្តរជាតិ?

ម្យ៉ាងទៀត រឿងចង់ធ្វើរបងព្រំដែនក៏អ៊ីចឹងដែរ! ថៃមានផែនការរួចទៅហើយ ក្នុងការសង់របងនៅតាមព្រំដែនដែលមានជម្លោះ ដោយសំអាងលើផែនទីគូសជាឯកតោភាគី ទាំងដែលទីនោះគឺជាដីខ្មែរសោះ។

ថៃមិនអាចសង់របងបានទេ ព្រោះនៅព្រំដែនគឺជាកន្លែងមានជម្លោះ ដូច្នេះមានតែការឡើងតុលាការអន្តរជាតិប៉ុណ្ណោះ ទើបអាចកំណត់ដាច់ស្រេចថាតើទីណាជាដីថៃ ទីណាជាដីខ្មែរ។ 

ទោះបីជាយ៉ាងណាក៏ដោយ បញ្ហានៅត្រង់ថា ហេតុអ្វីថៃមិនហ៊ានឡើងតុលាការ តើថៃខ្លាចអ្វី? ឬក៏ដូចពាក្យខ្មែរដែលតែងនិយាយថា មានតែចោរប៉ុណ្ណោះដែលខ្លាចច្បាប់ ឬក៏ថៃជាចោរមែន?

ដូច្នេះ ដើម្បីបង្ហាញភាពស្អាតស្អំនិងដើម្បីបង្ហាញអន្តរជាតិថា ការអះអាងរបស់ថៃជាការពិតឬមិនពិត ថៃត្រូវតែឡើងតុលាការអន្តរជាតិ ខណៈកម្ពុជា ស្វាគមន៍ជានិច្ច៕

អត្ថបទ៖ សុខ សុវណ្ណ

ចុចអាន៖ កងទ័ពថៃ៖ របង​ព្រំដែន​ថ្មី​​ជាមួយ​កម្ពុជា​ ត្រូវ​ចំណាយ​ជាង​២៦ម៉ឺន​ដុល្លារ​ក្នុង​ប្រវែង​ដី​មួយ​គីឡូម៉ែត្រ