ផ្ទុះវីដេអូលោកត្រាំ រាំកំប្លុកកំប្លែង នៅ ម៉ាឡេស៊ី ទាញអ្នកចូលមើលជាង ៣៧ លានដង

វីដេអូរបស់ប្រធានាធិបតីសហរដ្ឋអាមេរិក ដូណាល់ ត្រាំ រាំតាមចង្វាក់ភ្លេងនៅក្នុងដំណើរទស្សនកិច្ចរបស់លោកទៅកាន់ប្រទេសម៉ាឡេស៊ីកាលពីថ្ងៃអាទិត្យ ទី២៦ តុលា សម្រាប់កិច្ចប្រជុំកំពូលអាស៊ានលើកទី៤៧ និងកិច្ចប្រជុំកំពូលពាក់ព័ន្ធ បានរីករាលដាលពាសពេញបណ្តាញសង្គម ដោយទាក់ទាញអ្នកចូលទស្សនាទូទាំងពិភពលោក ដល់ទៅចំនួន ៣៧,៩ លានដង នៅទូទាំងវេទិកាផ្សេងៗ។

ទីប្រឹក្សារបស់លោកត្រាំ គឺលោក Alex Bruesewitz បានបញ្ជាក់ពីភាពទាក់ទាញយ៉ាងខ្លាំងរបស់វីដេអូនេះ តាមអ៊ីនធឺណិត ដោយកត់សម្គាល់ពីការកើនឡើងយ៉ាងឆាប់រហ័សនៃប្រជាប្រិយភាពរបស់វា។

លោក Alex Bruesewitz បាននិយាយថា «វីដេអូនេះថតបានពីការរាំរបស់ប្រធានាធិបតីត្រាំ នៅប្រទេសម៉ាឡេស៊ី ទើបតែទទួលបានការចូលចិត្តលើសពីមួយលាននាក់នៅលើ Instagram ដែលលមានឈ្មោះថា «TeamTrump» របស់យើង ហើយមានអ្នកចូលមើលចំនួន ២១.៥ លានដង។ វាក៏មានអ្នកចូលមើលចំនួន ១៧.១ លានដងនៅលើហ្វេសប៊ុក និង ៩.៣ លានដងនៅលើ TikTok ផងដែរ»។

យ៉ាងណា លោកក៏បានគូសបញ្ចាក់បន្ថែមដោយលើកសរសើរនៅបណ្ដាញសង្គម X នៅថ្ងៃនេះថា លោកត្រាំគឺជាមេដឹកនាំពិភពលោក និងជាស្តេចនៃប្រព័ន្ធផ្សព្វផ្សាយសង្គមដ៏មានប្រជាប្រិយភាពបំផុត។

ជំនួយការពិសេសរបស់ប្រធានាធិបតី និងទីប្រឹក្សាទំនាក់ទំនងលោកស្រី Margo Martin ដែលបានបង្ហោះឡើងវិញនូវការបង្ហោះរបស់ Bruesewitz បាននិយាយថា វីដេអូឃ្លិបនេះបង្ហាញពីលោកត្រាំ ចូលរួមយ៉ាងកក់ក្តៅជាមួយប្រតិភូ និងចូលរួមក្នុងការរាំតាមតន្ត្រីក្នុងស្រុក។

ប្រធានាធិបតីអាមេរិក បានមកដល់ប្រទេសម៉ាឡេស៊ីនៅម៉ោងប្រហែល ១០ ព្រឹកថ្ងៃអាទិត្យ ហើយចាកចេញនៅម៉ោង ១០:០៦ ព្រឹកថ្ងៃនេះ ដែលជាការបញ្ចប់ដំណើរទស្សនកិច្ចលើកដំបូងទៅកាន់ប្រទេសម៉ាឡេស៊ី និងការចូលរួមលើកដំបូងរបស់គាត់នៅក្នុងកិច្ចប្រជុំកំពូលមេដឹកនាំអាស៊ាន ចាប់តាំងពីចាប់ផ្តើមតំណែងប្រធានាធិបតីលើកទីពីរនៅក្នុងខែមករា ឆ្នាំ ២០២៥។

លោកត្រាំ គឺជាប្រធានាធិបតីអាមេរិកទីបី ក្នុងប្រវត្តិសាស្ត្រដែលបានទៅទស្សនកិច្ចនៅប្រទេសម៉ាឡេស៊ី បន្ទាប់ពីលោក Lyndon B. Johnson ក្នុងឆ្នាំ ១៩៦៦ និងលោក Barack Obama ក្នុងឆ្នាំ ២០១៤ និង ២០១៥៕

សូមទស្សនាវីដេអូខាងក្រោម៖

@themalaymail

US President Donald Trump shared a light-hearted moment with Prime Minister Datuk Seri Anwar Ibrahim this morning, dancing on the red carpet to the tune of Hawaii Five-O as a welcoming band played at the Kuala Lumpur International Airport. Trump performed his signature campaign-style dance — a slow, rhythmic movement involving air punches and hip sways — in response to the performers.

♬ original sound – themalaymail – themalaymail

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ប្រជាជន កម្ពុជា ដឹងគុណលោក អាន់វ៉ា ​​ក្រោយជួយឲ្យមានកិច្ចព្រមព្រៀងសន្តិភាពជាមួយ ថៃ