តៃវ៉ាន់ច្រានចោលគោលការណ៍ «ប្រទេសមួយ ប្រព័ន្ធពីរ» របស់ចិន

ប្រធានាធិបតី ឡៃ ឈីងតេ បាននិយាយកាលពីថ្ងៃសុក្រ​ទី​៣១​ខែ​តុលា​ថា កោះ​តៃវ៉ាន់បដិសេធយ៉ាងម៉ឺងម៉ាត់នូវគោលការណ៍«ប្រទេសមួយ ប្រព័ន្ធពីរ» របស់​ប្រទេស​ចិន ហើយនឹងការពារអធិបតេយ្យភាព សេរីភាព និងលទ្ធិប្រជាធិបតេយ្យ ចំពេលមានសម្ពាធជាថ្មីពីទីក្រុងប៉េកាំង ដើម្បីនាំយកកោះដែលគ្រប់គ្រងដោយខ្លួនឯង​នេះ​មកក្រោមការគ្រប់គ្រងរបស់ក្រុង​ប៉េកាំង។

ថ្លែងទៅកាន់ទាហាននៅឯមូលដ្ឋានយោធានៅ Hukou ភាគខាងជើងកោះតៃវ៉ាន់ លោកឡៃ បាន​លើក​ឡើង​ថា មានតែកម្លាំងប៉ុណ្ណោះដែលអាចធានាបាននូវសន្តិភាពយូរអង្វែង និងបានព្រមានប្រឆាំងនឹងការរំលោភលើអធិបតេយ្យភាពរបស់កោះតៃវ៉ាន់។ លោក​បាន​មាន​ប្រសាសន៍​ថា «ការ​ទទួល​យក​ការ​ទាមទារ​របស់​អ្នក​ឈ្លានពាន និង​ការ​បោះ​បង់​អធិបតេយ្យភាព​ពិត​ជា​មិន​អាច​សម្រេច​បាន​សន្តិភាព​ឡើយ។ យើងត្រូវតែរក្សាស្ថានភាពដដែលដោយសេចក្តីថ្លៃថ្នូរ និងការដោះស្រាយ ប្រឆាំងដាច់ខាតការ​កាត់​​បញ្ចូល​ជា​ឧបសម្ព័ន្ធ ការឈ្លានពាន និងការជំរុញ​ឲ្យ​មានការបង្រួបបង្រួម​ទាំង​បង្ខំ»។

លោកឡៃ​ ដែលទីក្រុងប៉េកាំងចាត់​ទុក​ថាជា«អ្នកបំបែកខ្លួន» បានបន្ថែមថា តៃវ៉ាន់នឹង«រក្សាប្រព័ន្ធរដ្ឋធម្មនុញ្ញសេរី និងប្រជាធិបតេយ្យរបស់យើងជារៀងរហូត និង​បដិសេធ​គោលការណ៍ប្រទេសមួយ ប្រព័ន្ធពីរ» ដោយសំដៅលើគំរូដែលចិនប្រើដើម្បីគ្រប់គ្រងហុងកុង និងម៉ាកាវ។

ការកត់សម្គាល់របស់​មេ​ដឹក​នាំ​តៃវ៉ាន់ បានកើតឡើងបន្ទាប់ពីប្រទេសចិនបានព្រមានកាលពីដើមសប្តាហ៍នេះថា ខ្លួននឹង​មិន​បដិសេធ​ប្រើប្រាស់កម្លាំងប្រឆាំងនឹងតៃវ៉ាន់ទេ ដោយធ្វើ​ឲ្យ​មានភាពតានតឹងរឹត​តែខ្លាំងឡើង។

លោកឡៃ បាននិយាយថា «គ្មានគណបក្សនយោបាយធំណាមួយនៅតៃវ៉ាន់គាំទ្រគំនិតប្រទេសមួយ ប្រព័ន្ធពីរ របស់ប្រទេសចិននោះឡើយ» ដោយបន្ថែមថា «ការការពារលទ្ធិប្រជាធិបតេយ្យមិនគួរត្រូវបានមើលឃើញថាជាការបង្កហេតុនោះទេ។ ប្រជាជនតៃវ៉ាន់ដែលការពារអធិបតេយ្យភាពរបស់ពួកគេ និងរក្សារបៀបរស់នៅបែបប្រជាធិបតេយ្យ និងសេរីរបស់ពួកគេ មិនគួរត្រូវបានចាត់ទុកជាការញុះញង់នោះទេ។ ការវិនិយោគលើការការពារជាតិ គឺជាការវិនិយោគក្នុងសន្តិភាព»។

លោកឡៃ បានប្ដេជ្ញា​ថានឹងបង្កើនការចំណាយលើវិស័យការពារជាតិដល់​៥​ភាគរយនៃផលិតផលក្នុងស្រុកសរុបនៅឆ្នាំ​២០៣០​ ដើម្បីពង្រឹងសមត្ថភាពយោធារបស់កោះ ទប់​នឹងសម្ពាធកើនឡើងរបស់ចិន៕

ដោយ៖ ឈាង