UN ដកទណ្ឌកម្មលើប្រធានាធិបតីស៊ីរី មុនពេលដំណើរទស្សនកិច្ចនៅសេតវិមាន

ក្រុមប្រឹក្សាសន្តិសុខអង្គការសហប្រជាជាតិ បានបោះឆ្នោតគាំទ្រសេចក្ដី​សម្រេច​ដែលគាំទ្រដោយសហរដ្ឋអាមេរិក ដកទណ្ឌកម្មលើប្រធានាធិបតីស៊ីរី Ahmed al-Sharaa ដោយជម្រះផ្លូវសម្រាប់ដំណើរទស្សនកិច្ចជាប្រវត្តិសាស្ត្ររបស់លោកទៅកាន់ទីក្រុងវ៉ាស៊ីនតោននៅសប្តាហ៍ក្រោយ។ នេះ​បើ​យោង​តាម​ការ​ចុះ​ផ្សាយ​របស់​ BBC នៅ​ថ្ងៃ​សុក្រ​ទី​៧ខែ​វិច្ឆិកា​ឆ្នាំ​២០២៥។

លោក Sharaa ដែលបានដឹកនាំការវាយលុករបស់ពួកឧទ្ទាមហើយ​បានបណ្តេញ​លោក Bashar al-Assad ក្នុងខែធ្នូ​ឆ្នាំ​២០២៤ និងបានបញ្ចប់សង្រ្គាមស៊ីវិលរយៈពេល​១៣​ឆ្នាំនោះ គ្រោងនឹងជួបជាមួយប្រធានាធិបតីអាមេរិក ដូណាល់ ត្រាំ នៅសេតវិមាននា​ថ្ងៃចន្ទក្រោយ។

ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោក Mike Waltz បាននិយាយថា ការបោះឆ្នោតនេះ​បានបញ្ជូន«សញ្ញានយោបាយដ៏រឹងមាំ» ដោយទទួលស្គាល់ថា ប្រទេសស៊ីរីបានឈានចូល«សករាជថ្មី» ចាប់តាំងពីការដួលរលំរបស់លោក Assad។

សេចក្តី​សម្រេច​ចិត្ត​នេះ ​ក៏​បាន​ដក​ទណ្ឌកម្ម​របស់​អង្គការ​សហ​ប្រជាជាតិ​លើ​​រដ្ឋមន្ត្រី​មហាផ្ទៃ​ស៊ីរី​លោក Anas Khattab ផង​ដែរ។

លោក Sharaa អតីតមេដឹកនាំ Hayat Tahrir al-Sham (HTS) ធ្លាប់មានទំនាក់ទំនងជាមួយ​ក្រុម​ al-Qaeda ហើយ​ស្ថិតនៅក្រោមការដាក់ទណ្ឌកម្មអន្តរជាតិអស់​ជាច្រើនឆ្នាំ។ សហរដ្ឋអាមេរិកបានលុបឈ្មោះ Hayat Tahrir al-Sham ជាអង្គការភេរវករបរទេសកាលពីខែកក្កដា ដោយលើកឡើងពីកំណែទម្រង់របស់ក្រុមក្រោមការដឹកនាំរបស់លោក Sharaa។

រដ្ឋមន្ត្រីការបរទេសស៊ីរីបានស្វាគមន៍ការសម្រេចចិត្តរបស់អង្គការសហប្រជាជាតិ ដោយនិយាយថា​ ទីក្រុង​ដាម៉ាស«សម្តែងការដឹងគុណចំពោះសហរដ្ឋអាមេរិក និងប្រទេសជាមិត្តចំពោះការគាំទ្ររបស់ពួកគេចំពោះស៊ីរី និងប្រជាជនរបស់ខ្លួន»។

ប្រធានាធិបតីត្រាំ បានសរសើរការដឹកនាំរបស់លោក Sharaa ដោយលើក​ឡើង​ថា ប្រធានាធិបតីស៊ីរីបានធ្វើ«ដំណើរឆ្ពោះទៅរកសន្តិភាព»។

អ្នកទាំងពីរបានជួបគ្នាចុងក្រោយនៅក្នុង​ខែឧសភា ក្នុងអំឡុងដំណើរទស្សនកិច្ចរបស់លោកត្រាំ​ទៅកាន់​ទីក្រុងរីយ៉ាដ ហើយ​លោក Sharaa ក៏បានថ្លែងទៅកាន់​មហាសន្និបាតអង្គការសហប្រជាជាតិក្នុង​ខែកញ្ញា ដោយក្លាយជាមេដឹកនាំស៊ីរីដំបូងគេដែលធ្វើដូច្នេះក្នុងរយៈពេលជិត​៦​ទសវត្សរ៍។

នៅក្នុងសុន្ទរកថានោះ លោក Sharaa បានប្រកាសថា ស៊ីរីកំពុង«ដណ្តើមយកទីតាំងត្រឹមត្រូវរបស់ខ្លួនឡើងវិញ ក្នុងចំណោមប្រជាជាតិនានានៃពិភពលោក» ហើយបានបង្ហាញពីសាមគ្គីភាពជាមួយប្រជាជន​ហ្គាហ្សា៕

ប្រែសម្រួល៖ ឈាង