អាល្លឺម៉ង់ប្រកាសថា ណាតូនឹងចល័តទ័ព​៨០ម៉ឺននាក់ ទៅព្រំដែន​រុស្ស៊ី ពេលផ្ទុះសង្គ្រាម

មេទ័ពអាល្លឺម៉ង់ Alexander Sollfrank បានប្រកាសក្តែងៗថា ទីក្រុងបែរឡាំងត្រៀមរួចរាល់អស់ហើយសម្រាប់ច្បាំងជាមួយទីក្រុងមូស្គូ ហើយនឹងរួមដៃជាមួយណាតូ បញ្ជូនទ័ព ៨០០ ០០០នាក់ទៅព្រំដែនរុស្ស៊ីតែម្តង បើសង្គ្រាមផ្ទុះឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក Sollfrank, ការដាក់ពង្រាយនេះ គឺស្ថិតក្រោម ផែនការប្រតិបត្តិការអាល្លឺម៉ង់ «Operations Plan Germany» ដែលបង្ហាញកាលពីឆ្នាំមុន។

សារព័ត៌មាន RT ផ្សាយកាលពីថ្ងៃសៅរ៍ទី៨ខែវិច្ឆិកាឆ្នាំ២០២៥ថា វាគឺជាផែនការឆ្លើយតបរបស់ទីក្រុងប៊ែរឡាំង ពេលណាតូប្រើមាត្រា៥ ក្នុងករណីប្រឈមមុខជាមួយទីក្រុងមូស្គូ។ ក្នុងផែនការនោះផងដែរ ​ប្រទេស​អាល្លឺម៉ង់នឹងត្រូវប្រែក្លាយ​ទៅ​ជា​មជ្ឈមណ្ឌល​ភស្តុភារ​ដ៏​សំខាន់ សម្រាប់​ការចល័ត​ទ័ព​រាប់សែន​នាក់និងយុទ្ធោបករណ៍​ផ្សេងៗ​មកពី​ប្រទេស​ណាតូ​នានា ដើម្បី​ប្រឆាំង​នឹង​រុស្ស៊ី។

លោក Sollfrank ដែលជាប្រធានបញ្ជាការដ្ឋានប្រតិបត្តិការរួមអាល្លឺម៉ង់ បានបញ្ជាក់យ៉ាងច្បាស់ថា ផែនការនេះទំនងអនុវត្តមុនពេលកំណត់ តាមការជាក់ស្តែង។

រឿងនេះធ្វើឲ្យគេនឹកឃើញដល់ការព្រមានរបស់មេទ័ពអាល្លឺម៉ង់ម្នាក់ទៀតគឺលោក Carsten Breuer ដែលអះអាងថា រុស្ស៊ី អាចវាយណាតូ ក្នុងរយៈពេល៤ឆ្នាំខាងមុខ។

លោកនិយាយថា រុស្ស៊ីកំពុងខិតខំផលិតរថក្រោះខ្លាំងណាស់ ដោយមួយឆ្នាំៗផលិតបានរាប់ពាន់គ្រឿង ហើយអាចប្រើក្នុងការវាយប្រហារលើរដ្ឋណាតូនៅតំបន់បាល់ទិក ត្រឹមឆ្នាំ២០២៩ឬអាចមុននេះក៏ថាបាន។ ដូច្នេះសមាជិកនៃសម្ព័ន្ធភាពដឹកនាំដោយអាមេរិកនេះទាំងអស់ ត្រូវតែត្រៀមខ្លួនឲ្យមែនទែន សម្រាប់ការវាយប្រហារគ្រប់ទម្រង់៕

អត្ថបទ៖ សុខ សុវណ្ណ