អ្នកស្លាប់ដោយលិចទូក កើនដល់ ២១នាក់ ខណៈជោគវាសនាមនុស្សជាង២៣០នាក់ នៅមិនទាន់ដឹង

អាជ្ញាធរនៅប្រទេសម៉ាឡេស៊ី-ថៃ បានរកឃើញសាកសពយ៉ាងហោចណាស់ ២១នាក់បន្ថែមទៀត ខណៈពេលដែលពួកគេកំពុងស្វែងរកអ្នកនៅរស់រានមានជីវិតប្រហែល២៣០ នាក់ផ្សេងទៀត កំពុងបាត់ខ្លួនដោយសារហេតុការណ៍ក្រឡាប់ទូក។ នេះបើយោងតាមការលើកឡើងរបស់ប៉ូលិស និងមន្ត្រីសមុទ្រ កាលពីថ្ងៃចន្ទ ទី១០ វិច្ឆិកា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ពី Reuters មន្ត្រីបាននិយាយថា ទូកក្រឡាប់នេះបានដឹកជនអន្តោប្រវេសន៍ប្រហែល ៧០នាក់ ភាគច្រើនត្រូវបានគេជឿថា ជាជនជាតិរ៉ូហ៊ីងយ៉ា ដែលរងទុក្ខបុកម្នេញក្នុងប្រទេសមីយ៉ាន់ម៉ា ទើបបណ្ដាលឲ្យពួកគេព្យាយាមលួចចូលម៉ាឡេស៊ី ប៉ុន្តែទូកនោះបានក្រឡាប់នៅជិតកោះ Tarutao លើដែនទឹកថៃ កាលពីបួនថ្ងៃមុន។

លោក Romli Mustafa នាយកទីភ្នាក់ងារអនុវត្តច្បាប់សមុទ្រម៉ាឡេស៊ី (MMEA) នៅភាគខាងជើងរដ្ឋ Kedah និង Perlis បាននិយាយថា ក្រុមអ្នកជួយសង្គ្រោះបានរកឃើញសាកសពចំនួន៥បន្ថែមទៀតនៅថ្ងៃចន្ទ ដោយមិនបានបង្ហាញសញ្ជាតិ ឬជនជាតិឡើយ។ ចំណែកឯមនុស្ស៧នាក់ដែលបានរកឃើញនៅចុងសប្តាហ៍នេះ សុទ្ធតែត្រូវបានកំណត់អត្តសញ្ញាណថាជាជនជាតិរ៉ូហ៊ីងយ៉ា។

លោកបាននិយាយថា ប្រតិបត្តិការស្វែងរក និងជួយសង្គ្រោះត្រូវបានគេរំពឹងថា នឹងមានរយៈពេលប្រាំពីរថ្ងៃ អាស្រ័យលើការរកឃើញបន្ថែម និងអាកាសធាតុ។ យ៉ាងហោចណាស់មាននាវាចំនួន១២ គ្រឿងកំពុងស្វែងរកអ្នករស់រានមានជីវិតនៅក្នុងតំបន់ប្រហែល ២៥០ ម៉ាយល៍សមុទ្រការ៉េ ដែលមានទំហំប្រហាក់ប្រហែលនឹងទីក្រុងរដ្ឋសិង្ហបុរីដែរ។

ដោយឡែក យោងទៅតាមអ្នកនៅរស់រានមានជីវិត ពួកគេបានចេញដំណើរពីប្រទេសមីយ៉ាន់ម៉ានៅលើកប៉ាល់ធំមួយ ដែលដឹកមនុស្សប្រហែល ៣០០នាក់ ហើយបានអណ្តែតនៅលើសមុទ្រអស់រយៈពេលជិតមួយខែ។ ជនរងគ្រោះមួយចំនួនបាននិយាយថា កប៉ាល់មេបានលិច អ្នកខ្លះទៀតនិយាយថា ក្រុមនេះត្រូវបានបែងចែកជាទូកតូចៗចំនួនបី ហើយមួយក្នុងចំណោមពួកគេបានជួបគ្រោះថ្នាក់។

គួរបញ្ចាក់ដែរថា ជនជាតិរ៉ូហ៊ីងយ៉ាត្រូវបានគេធ្វើទុក្ខបុកម្នេញនៅក្នុងប្រទេសមីយ៉ាន់ម៉ាអស់រយៈពេលជាច្រើនទសវត្សរ៍មកហើយ ហើយមនុស្សរាប់ពាន់នាក់បានប្រថុយជីវិតរបស់ពួកគេជារៀងរាល់ឆ្នាំ ដើម្បីរត់គេចពីការគាបសង្កត់ និងសង្គ្រាមស៊ីវិល ដែលជារឿយៗជិះលើទូកបណ្ដោះអាសន្ន។ នៅឆ្នាំ ២០២៤ ជនជាតិរ៉ូហ៊ីងយ៉ាប្រហែល ៦៥៧នាក់បានស្លាប់នៅក្នុងដែនទឹកនៃតំបន់នេះ នេះបើយោងតាមឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ស្លាប់៧នាក់ និងបាត់ខ្លួនរាប់រយ ក្រោយទូកជនភៀសខ្លួនរ៉ូហ៊ីងយ៉ា លិចក្នុងសមុទ្រថៃ-ម៉ាឡេស៊ី