ស្លាប់៧នាក់ និងបាត់ខ្លួនរាប់រយ ក្រោយទូកជនភៀសខ្លួនរ៉ូហ៊ីងយ៉ា លិចក្នុងសមុទ្រថៃ-ម៉ាឡេស៊ី

តាមសារព័ត៌មាន Aljazeera កាលពីថ្ងៃអាទិត្យទី៩ វិច្ឆិកា ទូកមួយគ្រឿងដឹកជនជាតិរ៉ូហ៊ីងយ៉ាដែលរត់គេចខ្លួនពីប្រទេសមីយ៉ាន់ម៉ា បានក្រឡាប់នៅជិតព្រំដែនសមុទ្រថៃ-ម៉ាឡេស៊ី ដោយសម្លាប់មនុស្សយ៉ាងហោចណាស់៧នាក់ រួមទាំងស្ត្រី៥នាក់ និងក្មេងស្រីម្នាក់ ព្រមទាំងរាប់រយនាក់ផ្សេងទៀតកំពុងបាត់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក Romli Mustafa ប្រធានទីភ្នាក់ងារអនុវត្តច្បាប់សមុទ្រម៉ាឡេស៊ី (MMEA) បានបញ្ចាក់ថា នៅក្នុងតំបន់ ក្រុមជួយសង្គ្រោះបានរកឃើញសាកសពចំនួន៧នាក់រួចហើយ។ ស្របពេលដែល ទូកនេះបានលិចនៅកោះ Ko Tarutao ក្នុងប្រទេសថៃ ភាគខាងជើងនៃកោះ Langkawi នៃប្រទេសម៉ាឡេស៊ី។ ចំណែកឯ ទូកពីរគ្រឿងផ្សេងទៀតដែលដឹកមនុស្សក្នុងបរិមាណស្រដៀងគ្នានេះ ក៏ត្រូវបានរាយការណ៍ថាបាត់ខ្លួនផងដែរ។

យោងតាមអ្នកនៅរស់រានមានជីវិត ពួកគេបានចេញដំណើរពីប្រទេសមីយ៉ាន់ម៉ានៅលើកប៉ាល់ធំមួយ ដែលដឹកមនុស្សប្រហែល ៣០០នាក់ ហើយបានអណ្តែតនៅលើសមុទ្រអស់រយៈពេលជិតមួយខែ។ ជនរងគ្រោះមួយចំនួនបាននិយាយថាកប៉ាល់មេបានលិច អ្នកខ្លះទៀតនិយាយថា ក្រុមនេះត្រូវបានបែងចែកជាទូកតូចៗចំនួនបី ហើយមួយក្នុងចំណោមពួកគេបានជួបគ្រោះថ្នាក់។

លោក Adzli Abu Shah អធិការប៉ូលិសរដ្ឋ Kedah បានប្រាប់ប្រព័ន្ធផ្សព្វផ្សាយក្នុងស្រុកថា ការងារជួយសង្គ្រោះកំពុងបន្តដោយមានការគាំទ្រពីកម្លាំងអនុវត្តច្បាប់សមុទ្រម៉ាឡេស៊ី។ លោកបានសង្កត់ធ្ងន់ថា ប្រសិនបើកប៉ាល់លិចពិតជាដឹកមនុស្ស ៣០០ នាក់មែន ចំនួនមនុស្សដែលត្រូវបានរកឃើញរហូតមកដល់ពេលនេះ គឺគ្រាន់តែជាផ្នែកតូចមួយប៉ុណ្ណោះ។

អស់ពេលជាយូរយារណាស់មកហើយ ប្រទេសម៉ាឡេស៊ីគឺជាជម្រករបស់ជនអន្តោប្រវេសន៍ និងជនភៀសខ្លួនរាប់លាននាក់មកពីតំបន់ផ្សេងទៀតនៃទ្វីបអាស៊ី ដែលភាគច្រើននៃពួកគេគ្មានឯកសារ ធ្វើការក្នុងឧស្សាហកម្មរួមទាំងសំណង់ និងកសិកម្ម។ ទោះជាយ៉ាងណាក៏ដោយ ការឆ្លងកាត់សមុទ្រតែងតែមានហានិភ័យដ៏ធំធេង ដែលនាំឲ្យមានសោកនាដកម្មជាច្រើន រួមទាំងការស្លាប់របស់មនុស្សជាង ២០ នាក់នៅក្នុងខែធ្នូ កាលពីឆ្នាំ ២០២១ នៅពេលដែលកប៉ាល់ចំណាកស្រុកមួយបានលិចនៅក្នុងដែនទឹកម៉ាឡេស៊ី៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

រលកយក្សស៊ូណាមិ វាយប្រហារខេត្តមួយនៅ ជប៉ុន ក្រោយរញ្ជួយដីដ៏ខ្លាំងក្លា