BBC សុំទោសលោកត្រាំ ប៉ុន្តែច្រានចោលការគំរាមកំហែងប្តឹងទាមទារសំណង១ពាន់លានដុល្លារ

បណ្ដាញផ្សាយព័ត៌មាន BBC បានចេញសេចក្តីថ្លែងការណ៍សុំទោសផ្ទាល់ទៅកាន់លោក ដូណាល់ ត្រាំ កាលពីថ្ងៃព្រហស្បតិ៍​ទី​១៣​ខែ​វិច្ឆិកា​ឆ្នាំ​២០២៥ ប៉ុន្តែបាននិយាយថា មិនមានមូលដ្ឋានច្បាប់សម្រាប់ការគំរាមកំហែងប្តឹងទាមទារសំណងរបស់លោកប្រឆាំងនឹងក្រុមហ៊ុនផ្សាយព័ត៌មានមួយ​នេះ ចំពោះភាពយន្តឯកសារ«Panorama» ឆ្នាំ២០២៤ ដែលក្រុមមេធាវីរបស់មេដឹកនាំ​អាមេរិក​អះអាងថាជាការបរិហារកេរ្តិ៍នោះទេ។

កម្មវិធីនោះបានកាត់តបីផ្នែកដាច់ដោយឡែកពីគ្នានៃសុន្ទរកថារបស់លោកត្រាំ​ នៅថ្ងៃទី៦ខែមករាឆ្នាំ២០២១ ក្នុងលក្ខណៈដែលហាក់ដូចជាបង្ហាញថា លោកត្រាំ​កំពុងអំពាវនាវ​ឲ្យ​មានអំពើហិង្សាមុនពេលមានកុបកម្មនៅវិមាន Capitol។

ក្រុមហ៊ុនផ្សាយព័ត៌មាន BBC របស់​អង់គ្លេស បាននិយាយថា «ខណៈដែល BBC ពិតជាសោកស្តាយចំពោះរបៀបដែលវីដេអូឃ្លីបនោះត្រូវបានកាត់ត យើងមិនយល់ស្របយ៉ាងដាច់អហង្ការថា មានមូលដ្ឋានសម្រាប់ការទាមទារបរិហារកេរ្តិ៍នោះទេ»។

ក្រុមមេធាវីរបស់លោកត្រាំ បានព្រមានកាលពីថ្ងៃអាទិត្យថា លោកនឹងប្តឹងទាមទារសំណងរហូតដល់១ពាន់លានដុល្លារ លុះត្រាតែ BBC ដកភាពយន្តឯកសារនោះចេញ សុំទោស និងផ្តល់សំណងដល់លោកចំពោះការខូចខាតផ្នែកហិរញ្ញវត្ថុ និងកេរ្តិ៍ឈ្មោះដែលបានចោទប្រកាន់។

ទោះបីជា BBC ច្រានចោលការទាមទារផ្លូវច្បាប់ក៏ដោយ ក៏ខ្លួនបានបញ្ជាក់ថា លោក Samir Shah ជាប្រធានក្រុមប្រឹក្សាភិបាលបានផ្ញើលិខិតផ្ទាល់ខ្លួនទៅកាន់សេតវិមាន ដើម្បីសុំទោសចំពោះការកាត់តនោះ។ លោក Shah ក៏បានប្រាប់គណៈកម្មាធិការសភាចក្រភពអង់គ្លេសផងដែរថា ការកាត់តនេះគឺជា«កំហុស​នៅ​ក្នុងការវិនិច្ឆ័យ»។

BBC បានបន្ថែម​ថា ខ្លួននឹងមិនផ្សាយឡើងវិញនូវភាពយន្តឯកសារនោះនៅលើវេទិកាណាមួយរបស់ខ្លួនឡើយ។

កាលពី​ថ្ងៃព្រហស្បតិ៍ ក្រុមហ៊ុនផ្សាយព័ត៌មាននេះក៏បានចាប់ផ្តើមពិនិត្យមើលការចោទប្រកាន់ថ្មីៗដែលត្រូវបានរាយការណ៍ដោយកាសែត The Telegraph ដែលបានលើកឡើងថា កម្មវិធីមួយទៀតឈ្មោះ Newsnight ក៏​បានប្រើប្រាស់ការកាត់តស្រដៀងគ្នានេះ​នៃសុន្ទរកថារបស់លោកត្រាំ​​ផង​ដែរ។

ភាពចម្រូងចម្រាសនេះបានបង្ក​ឲ្យ​ជា​វិបត្តិដ៏ធំបំផុតមួយសម្រាប់​ BBC ក្នុងរយៈពេលជាច្រើនទសវត្សរ៍​កន្លង​មក ដោយនាំ​ឲ្យ​មានការលាលែងពីតំណែងរបស់នាយកប្រតិបត្តិជាន់ខ្ពស់ពីររូប និងការចោទប្រកាន់ជាថ្មីអំពីភាពលម្អៀង។

BBC ដែលត្រូវបានបង្កើតឡើងក្នុងឆ្នាំ១៩២២ និងទទួលបានថវិកាភាគច្រើនតាមរយៈថ្លៃអាជ្ញាប័ណ្ណ បច្ចុប្បន្នកំពុងគ្មានមេដឹកនាំអចិន្ត្រៃយ៍ ខណៈរដ្ឋាភិបាលអង់គ្លេស​កំពុងពិចារណាជម្រើសផ្តល់មូលនិធិនៅពេលអនាគត៕

ប្រែសម្រួល៖ ឈាង