តើ ត្រាំ អាចបញ្ចប់សង្គ្រាមរុស្ស៊ី-អ៊ុយក្រែនបាន​ទេ​ បើពេលនេះ សូម្បីថៃ ក៏លោកធ្វើអ្វីមិនចេញផងនោះ?

អំឡុងយុទ្ធនាការឃោសនាបោះឆ្នោតប្រធានាធិបតីអាមេរិកអាណត្តិទី២ លោក ដូណាល់ ត្រាំ ខាងគណបក្សសាធារណរដ្ឋ បានអួតអាងថា ពេលឈ្នះតំណែងប្រធានាធិបតីប្រទេសមហាអំណាចផុតលេខ លោកនឹងបញ្ចប់សង្គ្រាមរុស្ស៊ី-អ៊ុយក្រែន ត្រឹមរយៈពេល២៤ម៉ោងប៉ុណ្ណោះ។

កាលនោះ នរណាក៏ឆ្ងល់ដែរថា តើបុរសម្នាក់នេះមានយុទ្ធសាស្រ្តអ្វីហើយខ្លាំងកម្រិតណាទៅ ទើបអាចបញ្ចប់សង្គ្រាមត្រឹមរយៈពេលដ៏ខ្លីបែបនេះ។

យ៉ាងណា ឥឡូវជិត១ឆ្នាំហើយដែលលោកមិនទាន់ដោះស្រាយបាន ខណៈសង្គ្រាមនៅតែឆាបឆេះ នឹងអូសបន្លាយពេលកាន់តែយូរ ដ្បិតលោកបានដាក់ចេញផែនការសន្តិភាពនិងធ្លាប់ចរចាជាមួយភាគីជម្លោះទាំងសងខាងជាច្រើនលើកច្រើនសាមកហើយក៏ដោយ។

ងាកមកជម្លោះព្រំដែនកម្ពុជា-ថៃនៅតំបន់អាស៊ីអាគ្នេយ៍ឯណេះវិញ លោកត្រាំក៏ខិតខំណាស់ដែរ ចាប់តាំងពីរៀបចំឲ្យមានបទឈប់បាញ់រហូតដល់កិច្ចព្រមព្រៀងសន្តិភាពទីក្រុងគូឡាឡាំពួ ដោយធ្វើការជាមួយនាយករដ្ឋមន្ត្រីម៉ាឡេស៊ីនិងជាប្រធានអាសានប្តូរវេនឆ្នាំ២០២៥ អាន់វ៉ា អ៊ីប្រាហ៊ីម។

លោកត្រាំពិតជាប្រើឥទ្ធិពលរបស់ខ្លួនដើម្បីបញ្ចប់សង្គ្រាមមួយនេះ ដើម្បីប្រាប់ពិភពលោកថា អាមេរិកពិតជាខ្លាំងនិងនៅតែជាមហាអំណាចលើសគេ ម្យ៉ាងលោកក៏ចង់ឈ្នះរង្វាន់ណូបែលសន្តិភាពផងដែរ ព្រោះមានសង្គ្រាមជាច្រើនទៀត ដែលលោកអះអាងថាបានបញ្ចប់។

សម្រាប់កម្ពុជា ប្រជាជននិងថ្នាក់ដឹកនាំ ពិតជាដឹងគុណនិងរំភើបក្រៃលែង ចំពោះការសម្របសម្រួលរបស់មហាអំណាចក្នុងការនាំសន្តិភាពមកជូន។

យ៉ាងណា លោកត្រាំ មិនអាចធ្វើឲ្យថៃព្រឺឡើយទោះមានការគំរាមដាក់ពន្ធគយខ្លាំងក្លា ហើយថៃហាក់គ្មានញញើតនិងទុកមុខឲ្យលោកត្រាំសោះ ព្រោះតែកងទ័ពថៃ បានបំពានបទឈប់បាញ់ម្តងហើយម្តងទៀត និងហែកចោលកិច្ចព្រមព្រៀងសន្តិភាព វាយប្រហារចូលកាន់តែជ្រៅក្នុងទឹកដីកម្ពុជា។

មិនត្រឹមកងទ័ព សូម្បីនាយករដ្ឋមន្ត្រី អានុទីន ឆាន់វីរៈគុល ក៏បោះសម្តីយ៉ាងឈ្លើយមួយលើកជាពីរលើកទៅមេដឹកនាំសេតវិមានផងដែរ ដោយមិនខ្លាចអំណាចលោកត្រាំ សូម្បីបន្តិច។ 

មានសំណួរថា បើត្រាំមិនអាចដោះស្រាយជម្លោះព្រំដែនកម្ពុជា-ថៃបានទេនោះ តើប្រធានាធិបតីអាមេរិករូបនេះ អាចមានឥទ្ធិពលទៅបញ្ចប់សង្គ្រាមរុស្ស៊ី-អ៊ុយក្រែនបានទេ? ដូច្នេះ មានតែចាំមើលប៉ុណ្ណោះ ថាលោក ត្រាំ នឹងចាត់វិធានការអ្វីជាបន្តទៀតលើថៃ ដើម្បីឲ្យងាកទៅគោរពតាមកិច្ចព្រមព្រៀងសន្តិភាពវិញ៕

អត្ថបទ៖ សុខ សុវណ្ណ