ព័ត៌មានអន្ដរជាតិ

សារព័ត៌មានថៃផ្សាយថា កងទ័ពមីយ៉ាន់ម៉ាប្រយុទ្ធគ្នាចូលដីថៃ និងប៉ះពាល់ប្រជាពលរដ្ឋ

បានផុស

៤ ខែ មុន

នៅ

ថ្ងៃចន្ទ ២៦ មករា ២០២៦

ដោយ

ការប្រយុទ្ធគ្នាយ៉ាងខ្លាំងបានផ្ទុះឡើងរវាងកងកម្លាំងយោធាមីយ៉ាន់ម៉ា និងកងទ័ពសហភាពជាតិការ៉ែន (KNU) ដែលទើបប្រកាសផ្តាច់ខ្លួន និងប្រកាសជារដ្ឋឯករាជ្យ នៅជិតព្រំដែនជាមួយប្រទេសថៃ ដែលបណ្តាលឱ្យមានការខូចខាតផ្ទះជនស៊ីវិលថៃ ប៉ុន្តែគ្មានរបាយការណ៍ថា មានអ្នកស្លាប់ឬរងរបួសនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់សារព័ត៌មានថៃ Khaosod English ការប្រយុទ្ធគ្នានេះបានកើតឡើងនៅភូមិមីនឡាផាន (Min La Pan) ដែលមានទីតាំងនៅទល់មុខភូមិម៉ែហ្គនកេន និងភូមិហួយម៉ាវ៉ាង (Mae Gon Ken និង Huay Mahawang) ក្នុងស្រុកម៉ែសូត ខេត្តតាក របស់ប្រទេសថៃ។

ទោះបីជាបែបនេះក្តី គ្មានប្រភពសារព័ត៌មានរបស់ប្រទេសមីយ៉ាន់ម៉ា បានផ្សាយអំពីការផ្ទុះអាវុធរវាងក្រុមយោធាទាំងពីរក្រុមនេះដែលបង្ហាញពីការប៉ះពាល់ដល់ប្រទេសថៃឡើយ។

ជារឿយៗ ក្រុមយោធារបស់រដ្ឋាភិបាលរបបសឹកមីយ៉ាន់ម៉ា តែងពើបប្រយុទ្ធគ្នាខ្លាំងជាមួយកងទ័ពសហភាពជាតិការ៉ែន (KNU) ហើយក្រុមនេះក៏បានប្រកាសផ្តាច់ខ្លួនជារដ្ឋឯករាជ្យកាលពីដើមខែមករា ប៉ុន្តែគ្មានបរទេសណាមួយចាប់អារម្មណ៍ទទួលស្គាល់ឡើយ លើកលែងតែសារព័ត៌មានថៃបានផ្សព្វផ្សាយយ៉ាងទូលំទូលាយអំពីការប្រកាសឯករាជ្យនោះ។

យោងសេចក្តីរាយការណ៍របស់ Khaosodនៅថ្ងៃទី២៦ខែមករានេះ ក្នុងការប្រយុទ្ធគ្នាចុងក្រោយនេះ យោធាមីយ៉ាន់ម៉ាបានប្រើប្រាស់យន្តហោះគ្មានមនុស្សបើក ដែលប្រើប្រាស់ដោយកងពលថ្មើរជើងទី២២ រួមទាំងយន្តហោះគ្មានមនុស្សបើកទម្លាក់គ្រាប់បែក និងយន្តហោះគ្មានមនុស្សបើកធ្វើអត្តឃាត «កាមីកាហ្សេ» ដើម្បីកំណត់គោលដៅទីតាំងរបស់ក្រុមតស៊ូការេន (KNU) នៅក្នុងតំបន់ប្រទាញប្រទុងគ្នានោះ។

ការវាយប្រហារដោយយន្តហោះគ្មានមនុស្សបើកបានកំណត់គោលដៅទីតាំងរឹងមាំរបស់ KNU ដែលមានទីតាំងប្រហែល១គីឡូម៉ែត្រពីព្រំដែនថៃ ក្នុងភូមិហួយម៉ាវ៉ាង ដែលជាផ្នែកមួយនៃតំបន់ប្រតិបត្តិការរបស់កងកម្លាំងប្រឆាំងរដ្ឋាភិបាល។ ចំនួនអ្នកស្លាប់ និងរបួសនៅសងខាងនៅតែមិនទាន់ច្បាស់លាស់នៅឡើយ។

យោធាមីយ៉ាន់ម៉ាបានព្យាយាមដណ្តើមយកមូលដ្ឋានព្រៃឈើមួយនៅមីនឡាផាន (Min La Pan) ប៉ុន្តែត្រូវបានវាយបកវិញ បន្ទាប់ពីការបាញ់ប្រហារអាវុធធុនតូចយ៉ាងខ្លាំង។ ការបាញ់ប្រហារគ្នានេះបានបណ្តាលឱ្យគ្រាប់កាំភ្លើងហោះទៅបុកផ្ទះពលរដ្ឋថៃមួយខ្នង ដែលបណ្តាលឱ្យខូចខាត។ មិនមានរបាយការណ៍អំពីអ្នករងរបួសក្នុងចំណោមប្រជាជនថៃនោះទេ។

ការប៉ះទង្គិចគ្នាដែលកំពុងបន្តបង្ហាញពីភាពតានតឹងកាន់តែខ្លាំងឡើងតាមបណ្តោយព្រំដែនមីយ៉ាន់ម៉ា-ថៃ ខណៈដែលយោធាមីយ៉ាន់ម៉ាកំពុងបង្កើនប្រតិបត្តិការរបស់ខ្លួនប្រឆាំងនឹងក្រុមប្រដាប់អាវុធជនជាតិភាគតិចនៅក្នុងរដ្ឋការ៉ែន៕

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា