ព័ត៌មានអន្ដរជាតិ

ប្រទេសអាស៊ានមួយនេះអនុញ្ញាតប្រើវ៉ាក់សាំង Pfizer បន្ទាន់ដល់ក្មេងអាយុ១២-១៥ ឆ្នាំ

បានផុស

៥ years មុន

នៅ

ថ្ងៃព្រហស្បតិ៍ ២៧ ឧសភា ២០២១

ដោយ

ប្រទេសហ្វីលីពីនអនុញ្ញាតឲ្យប្រើវ៉ាក់សាំងការពារកូវីដ-១៩ Pfizer-BioNTech ជាបន្ទាន់សម្រាប់ចាក់ដល់កុមារអាយុ១២ឆ្នាំដល់១៥ឆ្នាំ។ នេះបើយោងតាមប្រធានរដ្ឋបាលចំណីអាហារ និងឱសថរបស់ប្រទេសនេះបាននិយាយ។

ការអនុញ្ញាតឲ្យប្រើបន្ទាន់សម្រាប់មនុស្សវ័យក្មេងនេះជាការពង្រីកចំនួនមនុស្សដែលទទួលការចាក់វ៉ាក់សាំងដើម្បីទប់ស្កាតជំងឺកូវីដ-១៩ដែលកំពុងរាតត្បាតខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានរដ្ឋបាលចំណីអាហារ និងឱសថហ្វីលីពីន លោក Rolando Enrique Domingo មានប្រសាសន៍កំឡុងពេលផ្សាយតាមកញ្ចក់ទូរទស្សន៍ជាពេលជួបជាមួយលោកប្រធានាធិបតី Rodrigo Duterte កាលពីយប់ថ្ងៃពុធថា ៖«នៅក្នុងសប្តាហ៍នេះ យើងនឹងចេញពីការធ្វើវិសោធនកម្មដើម្បីអនុញ្ញាតឲ្យការប្រើប្រាស់បន្ទាន់នូវវ៉ាក់សាំងការពារកូវីដ-១៩ Pfizer សម្រាប់ចាក់ដល់ក្មេងអាយុពី១២ឆ្នាំដល់១៥ឆ្នាំ»។

វ៉ាក់សាំងការពារកូវីដ-១៩ Pfizer-BioNTech បានក្លាយជាវ៉ាក់សាំងមួយប្រភេទក្នុងចំណោមវ៉ាក់សាំង៧ប្រភេទដែលត្រូវបានអនុញ្ញាតឲ្យប្រើប្រាស់បន្ទាន់នៅប្រទេសហ្វីលីពីន។

សូមបញ្ជាក់ថា បើតាមទិន្នន័យ ប្រទេសហ្វីលីពីនទើបតែចាក់វ៉ាក់សាំងការពារកូវីដ-១៩បានមិនដល់១%នៃប្រជាជនរបស់ខ្លួន១០៨លាននាក់។ កាលពីសប្តាហ៍មុន ប្រទេសនេះទទួលបានវ៉ាក់សាំង៨.២លានដូស ប៉ុន្តែរហូតដល់ពេលនេះមានមនុស្សតែ៤លាននាក់ប៉ុណ្ណោះដែលហោចណាស់ចាក់បាន១ដូស។ ជនជាតិហ្វីលីពីនខ្លះនិយាយថា ពួកគេនឹងមិនចាក់វ៉ាក់សាំងសោះឡើយ។

យោងតាមការស្ទង់មតិរបស់ស្ថានីយ៍បរិយាកាសសង្គម (SWS) បានធ្វើលើមនុស្ស១២០០នាក់នៅខែឧសភានេះ អ្នកឆ្លើយតប៦៨%គឺមិនច្បាស់លាស់ ឬគ្មានឆន្ទៈចាក់វ៉ាក់សាំងទេ។ កង្វល់ដ៏ធំបំផុតរបស់ពួកគេគឺអាចមានផលប៉ះពាល់ ឬថា ពួកគេអាចនឹងស្លាប់ដោយសារវ៉ាក់សាំង។

លោកប្រធានាធិបតីហ្វីលីពីនចាក់វ៉ាក់សាំងSinopharm

ហ្វីលីពីនបានបញ្ជាទិញវ៉ាក់សាំង Sinovac, AstraZeneca, Pfizer និង Sputnik។ រដ្ឋាភិបាលបានឲ្យដឹងថា វ៉ាក់សាំងរាប់លានដូសទាំងនេះគ្រោងនឹងមកដល់នៅខែមិថុនាខាងមុខនេះ៕

អានបន្ថែម៖ រដ្ឋាភិបាលហ្វីលីពីនមានវ៉ាក់សាំងហើយ នៅពិបាករឿងប្រជាជនមិនចង់ចាក់ទៀត

ប្រែសម្រួល៖ វីរបុត្រ
ប្រភព៖ AP

Related Topics:ប្រទេសហ្វីលីពីន