ថ្មីទៀតហើយ! អ៊ីស្រាអែល រកឃើញដានវីរុសបំប្លែងខ្លួន ឥណ្ឌា នៅក្នុងប្រព័ន្ធលូទឹកស្អុយ

ក្រសួងសុខាភិបាលអ៊ីស្រាអែលបាននិយាយកាលពីថ្ងៃព្រហស្បតិ៍ថា ដាននៃវីរុសកូវីដ ១៩ បំប្លែងខ្លួនរបស់ឥណ្ឌា “Delta” ត្រូវបានគេរកឃើញនៅក្នុងប្រពន្ធ័លូទឹកស្អុយ នៃទីក្រុងឆ្នេរសមុទ្រ Ashkelon ភាគខាងត្បូងរបស់អ៊ីស្រាអែល ។

ក្រសួងបាននិយាយនៅក្នុងសេចក្តីថ្លែងការណ៍មួយថា លទ្ធផលនេះបានធ្វើឲ្យមានការព្រួយបារម្ភថា ប្រជាជនមួយចំនួននៅក្នុងទីក្រុងបានឆ្លងវីរុសបំប្លែងខ្លួននេះ ។

បន្ទាប់ពីការរកឃើញនេះ ក្រសួងបានអំពាវនាវដល់អ្នកណាម្នាក់ដែលមានគ្រុនក្តៅ ក្អក និងខ្សោយ ឬខ្លាចឆ្លងជំងឺ ត្រូវធ្វើតេស្តរកមើលឲ្យបានឆាប់ ដើម្បីបង្ការការផ្ទុះឡើងនៅក្នុងទីក្រុង ដែលមានប្រជាជនជាង ១៤ ម៉ឺននាក់មួយនេះ ។

មន្ត្រីសុខាភិបាលបានរាយការណ៍ពីករណីឆ្លងថ្មីចំនួន ២១៩ ករណីកាលពីថ្ងៃព្រហស្បតិ៍ ហើយវាជាលើកទី ២ ហើយក្នុងរយៈពេល ២ ខែ សម្រាប់ករណីឆ្លងមានលើសពី ១០០ ករណី ខណៈ ៧០ ភាគរយនៃករណីឆ្លងថ្មី គឺជាវីរុសបំប្លែងខ្លួនឥណ្ឌា “Delta” ។

ទន្ទឹមនោះ រដ្ឋាភិបាលអ៊ីស្រាអែលកំពុងជំរុញឲ្យប្រជាជន ចៀសវាងការធ្វើដំណើរដែលមិនចាំបាច់ទៅបរទេស ក៏ដូចជាអំពាវនាវដល់ឪពុកម្តាយអនុញ្ញាតឲ្យកូនរបស់ពួកគេ ដែលមានអាយុពី ១២ ទៅ ១៥ ឆ្នាំទទួលការចាក់វ៉ាក់សាំងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ អ៊ីស្រាអែល កំពុងជួបរលកឆ្លងវីរុសបំប្លែងខ្លួនឥណ្ឌា