មិនត្រឹមតែកូវីដទេ ក្រុម អូឡាំពិក ជម្រើសជាតិ អ៊ូហ្គង់ដា ម្នាក់ទៀត តេស្តឃើញវីរុសបំប្លែងខ្លួនឥណ្ឌា

លោកស្រី Marukawa Tamayo រដ្ឋមន្រ្តីក្រសួងអូឡាំពិក និងប៉ារ៉ាឡាំពិកទីក្រុងតូក្យូរបស់ប្រទេសជប៉ុននិយាយថា សមាជិកក្រុមកីឡាករអូឡាំពិកជម្រើសជាតិអ៊ូហ្គង់ដា ដែលបានធ្វើតេស្តវិជ្ជមានជំងឺកូវីដ ១៩ ពេលមកដល់ប្រទេសជប៉ុន  ត្រូវបានគេរកឃើញថា បានឆ្លងវីរុសបំប្លែងខ្លួនឥណ្ឌា “Delta” ម្នាក់ទៀត ។

ក្រុមអ៊ូហ្គង់ដា ដែលមានសមាជិក ៩ នាក់ បានមកដល់អាកាសយានដ្ឋាន Narita ជិតទីក្រុងតូក្យូកាលពីថ្ងៃសៅរ៍សប្តាហ៍មុន ។ ការឆ្លងដំបូងត្រូវបានគេរកឃើញនៅឯទីតាំងធ្វើចត្តាឡីស័ករបស់ព្រលានយន្តហោះ ។

ក្រោយមក សមាជិកក្រុមផ្សេងទៀតបានផ្ទេរទៅទីក្រុង Izumisano ក្នុងខេត្ត Osaka សម្រាប់ជំរុំហ្វឹកហាត់ ហើយពួកគេក៏ត្រូវបានធ្វើតេស្តដោយអាជ្ញាធរសុខាភិបាលខេត្ត ដែលមានទំនាក់ទំនងជិតស្និទ្ធជាមួយអ្នកឆ្លងវីរុសនេះ ។

ការធ្វើតេស្តនោះបានរកឃើញសមាជិកទី ២ វិជ្ជមានវីរុសបំប្លែងខ្លួនឥណ្ឌា នៅទីក្រុងម្ចាស់ផ្ទះកាលពីថ្ងៃព្រហស្បតិ៍ ។

ទន្ទឹមនោះ លោកស្រី Marukawa Tamayo បាននិយាយនៅថ្ងៃសុក្រនេះថា រដ្ឋាភិបាលក៏កំពុងធ្វើលំដាប់ហ្សែននៃវីរុសក្នុងករណីទី ២ នេះផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ គ្រូ​ជម្រើស​ជាតិ​អ៊ូហ្គង់ដា​ម្នាក់​វិជ្ជមាន​កូវីដ​ ក្រោយ​ទៅ​ដល់​ជប៉ុន​ដើម្បី អូឡាំពិក