ថៃ នឹងប្រើថ្នាំផ្ដាសាយធំមួយប្រភេទទៀតព្យាបាលអ្នកជំងឺកូវីដទាំងអស់

ក្រសួងសុខាភិបាលថៃនិយាយថា អ្នកជំងឺកូវីដទាំងអស់នឹងទទួលបានថ្នាំប្រឆាំងវីរុស Favipiravir ដែលជាថ្នាំប្រយុទ្ធប្រឆាំងនឹងជំងឺផ្ដាសាយធំ ខណៈរដ្ឋាភិបាលមានគម្រោងស្តុកទុកថ្នាំគ្រាប់នេះចំនួន ៤២០ លានគ្រាប់ ។

ទន្ទឹមនោះ កាលពីថ្ងៃសៅរ៍ នាយកដ្ឋានសេវាកម្មវេជ្ជសាស្រ្តបានប្រកាសថា មន្រ្តីសុខាភិបាលអាចផ្ដល់ថ្នាំនេះដល់អ្នកជំងឺកូវីដគ្រប់ក្រុមទាំងអស់បាន ។

ក្រសួងបានប្រកាសថា ចំណែកអ្នកជំងឺពណ៌បៃតងដែលមានរោគសញ្ញាស្រាលទៅមិនមានរោគសញ្ញា ដែលស្ថិតនៅក្រោមការព្យាបាលតាមផ្ទះ នឹងត្រូវប្រើស្មៅប្រមាត់មនុស្ស ។

ទោះយ៉ាងនេះក្តីលោកវេជ្ជបណ្ឌិត Kiattiphum Wongworajit ជាអគ្គលេខាធិការអចិន្ត្រៃយ៍នៃក្រសួងសុខាភិបាលបាននិយាយថា ក្រសួងបានកែសម្រួលផែនការប្រើប្រាស់ថ្នាំដើម្បីពន្លឿន និងពង្រីកការគ្រប់គ្រងអ្នកជំងឺកូវីដទាំងអស់ ដែលកំពុងកើនឡើងការស្លាប់ ។

ចាប់តាំងពីថ្ងៃទី ៤ ខែសីហា តម្រូវការថ្នាំ Favipiravir បានកើនឡើងដល់ ៨៥ ម៉ឺនគ្រាប់ក្នុងមួយថ្ងៃ ខណៈគ្រាន់តែទីក្រុងបាងកកប្រើប្រាស់ ៧៦ ម៉ឺនគ្រាប់ទៅហើយ ។

ស្របពេលជាមួយគ្នានេះ ក្រសួងបានប្រគល់ភារកិច្ចឲ្យអង្គការឱសថរបស់រដ្ឋាភិបាល (GOP) ទទួលបានថ្នាំ Favipiravir ចំនួន ១២០ លានគ្រាប់បន្ថែមទៀត ចាប់ពីខែសីហាដល់ខែកញ្ញា ហើយបន្ទាប់មក ៣០០ លានគ្រាប់ ចាប់ពីខែតុលាដល់ខែធ្នូ ។ លើសពីនេះ GPO នឹងទទួលបានថ្នាំចាក់បញ្ចូលតាមសេរ៉ូម Remdesivir ចំនួន ១០ ម៉ឺនបន្ថែមទៀតនៅខែនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ ជោគជ័យខ្លាំងឡើងៗ លោក ប្រាយុទ្ធ ឲ្យបង្កើតគណៈកម្មាធិការ សិក្សាយកថ្នាំផលិតពីស្មៅប្រមាត់មនុស្ស ទៅព្យាបាលកូវីដ