ខណៈវីរុស Delta កំពុងវាយលុកខ្លាំង មន្ទីរពេទ្យរាប់រយកន្លែងនៅ ហ្វីលីពីន ប្រកាសអាសន្នជិតអស់សមត្ថភាពដាក់អ្នកជំងឺកូវីដ

ក្រសួងសុខាភិបាលហ្វីលីពីនបាននិយាយនៅថ្ងៃចន្ទនេះថា មន្ទីរពេទ្យរាប់រយកន្លែងនៅប្រទេសហ្វីលីពីន ជិតនឹងអស់សមត្ថភាពដាក់អ្នកជំងឺកូវីដហើយ ដោយសារការកើនឡើងនៃករណីឆ្លងថ្មី រួមជាមួយនឹងវីរុសបំប្លែងខ្លួនឥណ្ឌា “Delta” ដែលកំពុងរាលដាលពាសពេញប្រទេសអាស៊ីអាគ្នេយ៍ ។

ទន្ទឹមនោះ អ្នកនាំពាក្យក្រសួងសុខាភិបាលលោកស្រី Maria Rosario Vergeire បាននិយាយថា “វាអាចទៅរួចដែលករណីនឹងបន្តកើនឡើង ។ ក្នុងចំណោមមន្ទីរពេទ្យចំនួន ១,២៩១ កន្លែងនៅប្រទេសហ្វីលីពីន ក្នុងនោះ ២៣៦ មន្ទីរពេទ្យបានឈានដល់ “កម្រិតធ្ងន់ធ្ងរ” ពោលមានអ្នកជំងឺជាង ៨៥ ភាគរយទៅហើយ ដោយសារតែការកើនឡើងនៃករណីឆ្លង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីបានបន្ថែមថា មន្ទីរពេទ្យនៅតំបន់រដ្ឋធានី ដែលជាចំណុចកណ្តាលនៃការផ្ទុះឡើងនាពេលបច្ចុប្បន្ននេះ កំពុងប្រឈមមុខនឹងស្ថានភាពស្រដៀងគ្នានេះដែរ ដោយមានមន្ទីរពេទ្យចំនួន ២៥ ក្នុងចំណោម ១៥៩ មន្ទីរពេទ្យ ជិតអស់សមត្ថភាពផ្ទុកអ្នកជំងឺកូវីដហើយ ។

ករណីឆ្លងជំងឺកូវីដ ១៩ នៅហ្វីលីពីន ដែលជាប្រទេសមានចំនួនប្រជាជន ១១០ លាននាក់ បាននិងកំពុងកើនឡើងក្នុងអត្រាឆ្លងពី ៨ ពាន់ករណីទៅ ១ ម៉ឺនករណីក្នុងមួយថ្ងៃ ក្នុងរយៈពេលប៉ុន្មានសប្តាហ៍ថ្មីៗនេះ ហើយលើសពីមធ្យមភាគប្រចាំថ្ងៃចំនួន ៥,៧០០ ករណីដែលបានរាយការណ៍កាលពីខែមុន ។

កាលពីថ្ងៃសុក្រសប្តាហ៍មុន អាជ្ញាធរបានដាក់តំបន់រដ្ឋធានីចំនួន ១៦ ដែលមានប្រជាជនជាង ១៣ លាននាក់ ស្ថិតនៅក្រោមការបិទខ្ទប់រយៈពេល ២ សប្តាហ៍ ដោយសារករណីឆ្លងទូទាំងប្រទេសឡើងជិតដល់កម្រិតខ្ពស់បំផុតរយៈពេល ៤ ខែ ។

ស្របពេលជាមួយគ្នានេះ ហ្វីលីពីនមានបំណងចាក់វ៉ាក់សាំងការពារជំងឺកូវីដ ១៩ រហូតដល់ ៧០ លាននាក់នៅឆ្នាំនេះ ហើយក្នុងនោះប្រជាជនចំនួន ១១ លាននាក់ បានចាក់វ៉ាក់សាំងពេញ ២ ដូស ខណៈចាប់តាំងពីរោគរាតត្បាតកើតឡើង ប្រទេសនេះបានកត់ត្រាករណីឆ្លងជំងឺ ១៩ ចំនួន ១.៦៥ លានករណី និងមានអ្នកស្លាប់ចំនួន ២៩,០០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ព្រោះតែ Delta ហ្វីលីពីន សម្រេចបិទខ្ទប់រដ្ឋធានី ម៉ានីល ទោះត្រូវខាតបង់សេដ្ឋកិច្ច រាប់ពាន់លានដុល្លារ