មេ UN ចេញមុខថ្កោលទោស “ការវាយប្រហារភេរវកម្ម” ដ៏សាហាវនៅ អាហ្វហ្គានីស្ថាន

អគ្គលេខាធិការអង្គការសហប្រជាជាតិ (UN) លោក Antonio Guterres កាលពីថ្ងៃព្រហស្បតិ៍បានថ្កោលទោសបំផ្ទុះគ្រាប់អត្តឃាត នៅក្បែរព្រលានយន្តហោះក្នុងរដ្ឋធានីកាប៊ុលរបស់អាហ្វហ្គានីស្ថាន ថាជាការវាយប្រហារភេរវកម្មដែលបានសម្លាប់ និងរបួសជនស៊ីវិលរាប់រយនាក់ ។

ការផ្ទុះដ៏សាហាវចំនួន ៣ លើកបានកើតឡើងតែប៉ុន្មានម៉ោងប៉ុណ្ណោះ បន្ទាប់ពីមន្រ្តីអង់គ្លេស និងអាមេរិកបានព្រមានពលរដ្ឋ និងសម្ព័ន្ធមិត្តរបស់ខ្លួនឲ្យនៅឆ្ងាយពីព្រលានយន្តហោះ ដោយសារមានរបាយការណ៍បង្ហាញថា “ការគំរាមកំហែងខ្ពស់នៃការវាយប្រហារភេរវកម្ម” កំពុងកើតមានឡើង ចំពេលមានការខិតខំប្រឹងប្រែងដកទ័ពនៅក្នុងប្រទេសដែលហែកហួរដោយសង្គ្រាម ។

ពាក់ព័ន្ធនឹងបញ្ហានេះ អ្នកនាំពាក្យអង្គការសហប្រជាជាតិលោក Stephane Dujarric បានប្រាប់អ្នកយកព័ត៌មានថា “ឧបទ្ទវហេតុនេះបញ្ជាក់ពីការប្រែប្រួលនៃស្ថានភាព នៅមូលដ្ឋាននៅអាហ្វហ្គានីស្ថាន ប៉ុន្តែហេតុការណ៍នេះក៏ពង្រឹងការតាំងចិត្តរបស់យើងផងដែរ នៅពេលយើងបន្តផ្តល់ជំនួយបន្ទាន់នៅទូទាំងប្រទេស ក្នុងការគាំទ្រប្រជាជនអាហ្វហ្គានីស្ថាន” ។

លោកបាននិយាយថា “តាមដែលយើងដឹងនៅពេលនេះ មិនមានអ្នកស្លាប់ និងរបួសក្នុងចំណោមបុគ្គលិកអង្គការសហប្រជាជាតិនោះទេ” ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ UN ចេញមុខសម្ដែងការព្រួយបារម្ភអំពីសិទ្ធិមនុស្សនៅអាហ្វហ្គានីស្ថាន