ទារិកាចម្លែក កើតមកមុខចាស់ជាងម្តាយ

ស្រ្តីម្នាក់ កំពុងទទួលបានការចាប់អារម្មណ៍យ៉ាងខ្លាំង បន្ទាប់ពីសម្រាលកូនស្រីម្នាក់ ដែលមើលទៅចាស់ជាងនាង ដោយសារតែទារិការូបនេះ កើតមកមានជំងឺកម្របំផុតមួយ។

ម្តាយអាយុ ២០ ឆ្នាំ បានស្វាគមន៍កូនស្រីរបស់នាងមកកាន់ពិភពលោកកាលពីខែមុន ប៉ុន្តែមិនយូរប៉ុន្មាន ព័ត៌មាននេះបានក្លាយជារឿងខូចចិត្ត។

ក្រុមគ្រូពេទ្យបានប្រាប់ម្តាយវ័យក្មេងរូបនេះថា កូនរបស់នាងមានជំងឺ Progeria ឬត្រូវបានគេស្គាល់ថាជារោគសញ្ញា Hutchinson-Gilford។

វាគឺជាជំងឺហ្សែនដ៏កម្របំផុតមួយ ដែលបណ្តាលឲ្យកុមារកើនអាយុយ៉ាងឆាប់រហ័ស ដោយចាប់ផ្តើមពីអាយុពីរឆ្នាំដំបូងនៃជីវិតរបស់ពួកគេ។

ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃចន្ទថា ស្ត្រីវ័យក្មេងរូបនេះបានសម្រាលកូននៅផ្ទះរបស់នាងក្នុងទីក្រុងតូច Libode នៃខេត្ត Eastern Cape ប្រទេសអាហ្វ្រិកខាងត្បូង។

ទារិការូបនេះ កើតមកមានដៃខុសពីធម្មតា និងស្បែកជ្រីវជ្រួញ។

ជាធម្មតា មនុស្សដែលកើតមកមានជំងឺ Progeria តែងតែជួបផលវិបាកនៃជំងឺសរសៃឈាមបេះដូងធ្ងន់ធ្ងរនៅពាក់កណ្តាលវ័យជំទង់ដល់វ័យ២០ឆ្នាំ។

យ៉ាងណាក្តី មូលហេតុជាក់លាក់នៃភាពចាស់លឿន ដែលត្រូវបានផ្សារភ្ជាប់ជាមួយនឹងរោគសញ្ញា Hutchinson-Gilford នេះ មិនទាន់ត្រូវបានគេដឹងច្បាស់នៅឡើយទេ។

អ្នកស្រាវជ្រាវខ្លះណែនាំថា ដំណើរការមិនប្រក្រតីនេះ គឺដោយសារតែការខូចខាតកោសិកាប្រមូលផ្តុំ។

គួរបញ្ជាក់ថា គិតត្រឹមឆ្នាំ២០២០ មូលនិធិស្រាវជ្រាវជំងឺ Progeria អន្តរជាតិ បានចុះបញ្ជីកុមារនិងមនុស្សពេញវ័យសរុបចំនួន១៣១នាក់ ដែលរស់នៅជាមួយជំងឺនេះ នៅទូទាំងពិភពលោក៕

ប្រែសម្រួល៖ Vann Vann

ប្រភព៖ Mirror

ចុចអាន៖ រឿងចម្លែក! ទារកកើតមកមានក្បាលដល់ទៅ៣ ប្រជាជននាំគ្នាហៅថា “ព្រះចាប់កំណើត”