ក្រុមហ៊ុន Moderna ចេញមុខបញ្ជាក់ពីសារធាតុក្នុងវ៉ាក់សាំង ដែល ជប៉ុន ចាក់ទៅបណ្ដាលឲ្យមនុស្សស្លាប់

ក្រុមហ៊ុន Moderna បាននិយាយថា វ៉ាក់សាំងការពារជំងឺកូវីដ ១៩ របស់ខ្លួនមួយចំនួន ដែលបានបញ្ជូនទៅប្រទេសជប៉ុនផ្ទុកទៅដោយភាគល្អិតដែកអ៊ីណុក ប៉ុន្តែក្រុមហ៊ុនមិនរំពឹងថា វានឹងបង្កហានិភ័យគ្រោះថ្នាក់ដល់អ្នកជំងឺឡើយ ។

ក្រុមហ៊ុនជីវបច្ចេកវិទ្យាអាមេរិក និងដៃគូរបស់ខ្លួនគឺក្រុមហ៊ុនឱសថជប៉ុន Takeda ដែលបានចែកចាយវ៉ាក់សាំងនេះបាននិយាយថា ពួកគេកំពុងសហការជាមួយអាជ្ញាធរជប៉ុនដើម្បីប្រមូលវ៉ាក់សាំងការពារជំងឺកូវីដ ១៩ ចំនួន ៣ បាច់ បន្ទាប់ពីការស៊ើបអង្កេតមួយបានរកឃើញសារធាតុកខ្វក់ពីដែកអ៊ីណុកនៅក្នុងដបមួយចំនួន ។

អាជ្ញាធរជប៉ុនបានផ្អាកការប្រើវ៉ាក់សាំង Moderna មានចំនួន ១.៦៣ លានដូសកាលពីសប្តាហ៍មុន បន្ទាប់ពីត្រូវបានជូនដំណឹងអំពីសារធាតុចម្លែក ឬមេរោគឆ្លង ។

ទន្ទឹមនោះក្រុមហ៊ុន Moderna បាននិយាយថា មេរោគឆ្លងពីដែកអ៊ីណុកប្រហែលជាកើតឡើងក្នុងអំឡុងពេលផលិត ។ មូលហេតុដែលទំនងបំផុតនៃមេរោគឆ្លងនេះ គឺជាប់ទាក់ទងនឹងការកកិតរវាងដែក ២ ដុំនៅក្នុងគ្រឿងម៉ាស៊ីនដែលដាក់បិទសន្ទះមាត់ដបវ៉ាក់សាំង ខណៈសម្ភារៈទាំងនោះត្រូវបានបញ្ជាក់ថាជាដែកអ៊ីណុក ។

ស្របពេលជាមួយគ្នានេះ បញ្ហាមេរោគឆ្លងរបស់វ៉ាក់សាំង Moderna ក៏កំពុងទទួលបានការយកចិត្តទុកដាក់បន្ថែមទៀត បន្ទាប់ពីក្រសួងសុខាភិបាលបាននិយាយកាលពីថ្ងៃសៅរ៍ថា បុរស ២ នាក់អាយុ ៣៨ ឆ្នាំនិង ៣០ ឆ្នាំបានស្លាប់កាលពីខែសីហា ពោលក្នុងរយៈពេលប៉ុន្មានថ្ងៃប៉ុណ្ណោះ បន្ទាប់ពីចាក់វ៉ាក់សាំង Moderna ដូសទី ២ ប៉ុន្តែមូលហេតុនៃការស្លាប់ក្នុងករណីទាំងពីរនេះ កំពុងស្ថិតក្នុងការស៊ើបអង្កេតនៅឡើយ ។

បន្ថែមពីនេះ ក្រុមហ៊ុន Moderna និង Takeda បាននិយាយនៅក្នុងសេចក្តីថ្លែងការណ៍រួមថា គ្មានភស្តុតាងបញ្ជាក់ថា ការស្លាប់នោះបណ្តាលមកពីវ៉ាក់សាំងនេះនោះទេ ។ ការជាប់ទាក់ទងរបស់វ៉ាក់សាំងនាបច្ចុប្បន្ននេះ ត្រូវបានចាត់ទុកថាជាករណីចៃដន្យ ។

គួរបញ្ជាក់ថា មនុស្សប្រហែល ៥០ ម៉ឺននាក់នាក់បានទទួលការចាក់វ៉ាក់សាំង Moderna ប៉ុន្តែ​រហូត​ដល់​ពេល​នេះ​មិន​មាន​សេចក្តី​រាយការណ៍ ឬ​ព័ត៌មាន​អ្វី​ពាក់​ព័ន្ធ​នឹង​បញ្ហា​សុខភាព​ឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ស្លាប់ ២ នាក់នៅជប៉ុន ក្រោយចាក់វ៉ាក់សាំង Moderna