រដ្ឋាភិបាលបណ្តោះអាសន្ន អាហ្វហ្គានីស្ថាន កំពុងឈឺក្បាលដោះស្រាយបញ្ហាប្រាក់ខែមន្ត្រីរាជការ

លោក Abdul Salam Hanafi ឧបនាយករដ្ឋមន្ត្រីស្តីទីបាននិយាយកាលពីថ្ងៃពុធថា រដ្ឋាភិបាលបណ្តោះអាសន្នរបស់ប្រទេសអាហ្វហ្គានីស្ថានកំពុងព្យាយាមដោះស្រាយបញ្ហាប្រាក់ខែរបស់មន្ត្រីរាជការ ។

នៅក្នុងសន្និសីទសារព័ត៌មាន មន្រ្តីរូបនេះបានសន្យាថា ប្រាក់ខែមន្ត្រីរាជការនឹងត្រូវបានចំណាយទាន់ពេលវេលា ។

លោកបាននិយាយថា រដ្ឋាភិបាលបណ្តោះអាសន្នបានបង្កើតគណៈកម្មាធិការមួយ ដើម្បីដោះស្រាយបញ្ហាសេដ្ឋកិច្ចដែលប្រទេសនេះជួបប្រទះ ហើយបញ្ហានៃការប្តូរប្រាក់ក៏នឹងត្រូវបានដោះស្រាយផងដែរ ។

មន្ត្រីរូបនេះបាននិយាយថា “យើងកំពុងធ្វើការលើផែនការយុទ្ធសាស្ត្រ ហើយយើងបានអនុវត្តវិធានការមួយចំនួន ដោយអំពាវនាវដល់ពាណិជ្ជករនៅក្នុងប្រទេស ចូលរួមក្នុងការកសាងប្រទេសជាតិ” ។

លោកក៏បាននិយាយផងដែរថា ពួកគេកំពុងទាក់ទងជាមួយប្រទេសជិតខាងរួមមានអ៊ូសបេគីស្ថាន និងតួកមេនីស្ថានស្តីពីការសាងសង់ហេដ្ឋារចនាសម្ព័ន្ធផ្សេងៗទៀតជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ តាលីបង់ ព្រមាន អាមេរិក ឲ្យគោរពសិទ្ធិដែនអាកាស អាហ្វហ្គានីស្ថាន ខ្លះផងប្រយ័ត្នមានផលវិបាក