ព័ត៌មានអន្ដរជាតិ

ប្រទេសអឺរ៉ុប២នេះ មានវ៉ាក់សាំងគ្រប់គ្រាន់ តែចាក់ដល់ពលរដ្ឋបានតិចទៅវិញ

បានផុស

៥ years មុន

នៅ

ថ្ងៃសៅរ៍ ២ តុលា ២០២១

ដោយ

មនុស្សធំពេញវ័យជិត៣ភាគ៤បានចាក់វ៉ាក់សាំងបង្ការកូវីដ-១៩ពេញដូស សហភាពអឺរ៉ុបជាអ្នកដឹកនាំពិភពលោកមួយនៅក្នុងការចាក់វ៉ាក់សាំង។ ប៉ុន្តែសាច់រឿងគួរឲ្យចាប់អារម្មណ៍កំពុងបិទបាំងការពិត ដែលការដាក់ឲ្យដំណើរការមិនស្មើគ្នាទូទាំងទ្វីប។

យោងតាមមជ្ឈមណ្ឌលគ្រប់គ្រង និងបង្ការជំងឺឆ្លងអឺរ៉ុប(ECDC)បានបង្ហាញថា ប្រទេសមួយចំនួនដូចជា អៀរឡង់ ម៉ាល់តា ព័រទុយហ្កាល់ និងដាណឺម៉ាកជិតសម្រេចបាននូវការចាក់វ៉ាក់សាំងជាសកល ដែលមានអត្រាចាក់ប្រហែលជា៩០%ហើយ។ ផ្ទុយទៅវិញ ប្រទេសរ៉ូម៉ានីនិងប៊ុលហ្គារីទើបចាក់វ៉ាក់សាំងដល់ប្រជាជនពេញដូសបានត្រឹម៣៣% និង២២%ប៉ុណ្ណោះ។

បញ្ហាមិនមែនដោយសារខ្វះវ៉ាក់សាំងទេ។ ប្រទេសអឺរ៉ុបទាំងអស់មានលទ្ធភាពទទួលបានវ៉ាក់សាំងដូចគ្នាដែលទទួលបានការអនុម័តដោយអឺរ៉ុបមានវ៉ាក់សាំង Pfizer/BioNTech, Moderna, AstraZeneca និង Johnson & Johnson។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសនីមួយៗមានសេរីភាពដើម្បីទទួលបានវ៉ាក់សាំងផ្សេងដែរ។ ជាឧទាហរណ៍ ប្រទេសហុងគ្រីទទួលបានវ៉ាក់សាំងរុស្ស៊ី Sputnik ដើម្បីចាក់ឲ្យប្រជាជនរបស់ខ្លួន។

លោក Ivan Krastev អ្នកវិទ្យាសាស្ត្រនយោបាយប៊ុលហ្គារី និងជាសមាជិកស្ថាបនិកនៃក្រុមប្រឹក្សាអឺរ៉ុបស្តីពីទំនាក់ទំនងអន្តរជាតិបាននិយាយថា ៖«ពួកគេមានវ៉ាក់សាំង។ អ្នកណាចង់ចាក់ គឺអាចចាក់បានតាមចិត្ត»។

លោក Krastev បន្តថា ផ្ទុយទៅវិញ ប៊ុលហ្គារីជួបបញ្ហាស្ទាក់ស្ទើរយ៉ាងខ្លាំងក្នុងការចាក់វ៉ាក់សាំងដែលបង្កឲ្យមានអស្ថិរភាពគោលនយោបាយ ទ្រឹស្តីឃុំឃិត និងកង្វះជំនឿនៅក្នុងអាជ្ញាធរ។

«មានការមិនពេញចិត្តកម្រិតខ្ពស់ ហើយមានទាំងនៅប៊ុលហ្គារី និងរ៉ូម៉ានី។ សូម្បីតែសហគមន៍វេជ្ជសាស្ត្រដូចជាក្រុមវេជ្ជបណ្ឌិត គិលានុប្បដ្ឋាក ក៏មានច្រើនស្ទាក់ស្ទើរក្នុងការចាក់វ៉ាក់សាំងដែរ ដូច្នេះហើយបានថា គ្មានអ្វីគួរឲ្យភ្ញាក់ផ្អើលទេដែលសង្គមទាំងមូលស្ទាក់ស្ទើរទទួលវ៉ាក់សាំងនោះ»។ លោកបានបញ្ជាក់។

រ៉ូម៉ានី និងប៊ុលហ្គារី បានជួបវិបត្តិនៃការផ្ទុះកូវីដ-១៩សាជាថ្មីចាប់ពីដើមខែកញ្ញាមក។ រ៉ូម៉ានីមានអ្នកឆ្លងថ្មីជាង៤៥០០០នាក់ និងស្លាប់ជាង៨០០នាក់ក្នុងមួយសប្តាហ៍គិតត្រឹមថ្ងៃអាទិត្យមុន ដែលនេះប្រហែលជាកម្រិតស្មើនឹងចំនួនឆ្លងខ្លាំងក្នុងរលកទី២កាលពីខែមេសា។

ECDC បានព្រមានកាលពីថ្ងៃព្រហស្បតិ៍ថា រដ្ឋដែលមានអត្រាចាក់វ៉ាក់សាំងទាបកំពុងប្រឈមហានិភ័យនៃការឆ្លងកើនឡើងចូលមន្ទីរពេទ្យ និងស្លាប់ បន្ទាប់ពីវិធានការសង្គមត្រូវបានបន្ធូរបន្ថយ។

«ស្ថិតក្នុងសេណារីយ៉ូបែបនេះ ដោយសារតែលំហូចូលមេរោគខ្ពស់ ប្រជាជនដែលងាយរងគ្រោះចាក់វ៉ាក់សាំងពេញហើយក៏ដោយ ក៏នៅតែប្រឈមនឹងការឆ្លង ហើយវិវត្តទៅធ្ងន់ធ្ងរក៏មាន»។ ECDC បាននិយាយនៅក្នុងការវាយតម្លៃហានិភ័យកូវីដចុងក្រោយបំផុតរបស់ខ្លួន។ ភ្នាក់ងារនេះបានជំរុញឲ្យបណ្តាប្រទេសដែលមានបញ្ហារឿងចាក់វ៉ាក់សាំងព្យាយាមយល់ថា ហេតុអ្វីបានជាប្រជាជនរបស់ខ្លួននៅតែស្ទាក់ស្ទើរ ហើយបន្ទាប់មកត្រូវដោះស្រាយបញ្ហា។

ប៊ុលហ្គារីនឹងរៀបចំការបោះឆ្នោតសភាលើកទី៣ឆ្នាំនេះក្នុងខែវិច្ឆុកា។ ការបោះឆ្នោតពីរលើកកន្លងមកនៅខែមេសា និងខែកក្កដា។ ជាលទ្ធផល ប្រទេសជាប់គាំងរឿងឃោសនាបោះឆ្នោតជាងការផ្សព្វផ្សាយវ៉ាក់សាំង។

ចំណែករដ្ឋាភិបាលរ៉ូម៉ានីបានស្តីបន្ទោសចំពើការចាក់វ៉ាក់សាំងទាបរបស់ខ្លួនបណ្តាលមកពីព័ត៌មានក្លែងក្លាយ និងទ្រឹស្តីឃុំឃិតដែលកំពុងរាលដាលខ្លាំងតាមអនឡាញ៕

ប្រែសម្រួល៖ វីរបុត្រ
ប្រភព៖ CNN