បើកប្រទេសទទួលភ្ញៀវទេសចរថ្ងៃនេះ ថៃ ព្រមានប្រជាជនកុំផឹកគ្រឿងស្រវឹងតាមទីសាធារណៈផ្ដេសផ្ដាស

លេខាធិការអចិន្ត្រៃយ៍ផ្នែកសុខភាពសាធារណៈថៃលោកវេជ្ជបណ្ឌិត Kiattiphum Wongrajit បាននិយាយកាលពីថ្ងៃអាទិត្យថា ប្រជាជនថៃគួរតែប្រុងប្រយ័ត្ន និងអនុវត្តយ៉ាងម៉ឺងម៉ាត់នូវរាល់វិធានការដើម្បីទប់ស្កាត់ការរីករាលដាលនៃជំងឺកូវីដ ១៩ ជាពិសេសនៅដែលប្រទេសនេះបានបើកដំណើរការទទួលភ្ញៀវទេសចរឡើងវិញ ។

លោកបាននិយាយថា មជ្ឈមណ្ឌលគ្រប់គ្រងស្ថានភាពជំងឺកូវីដ ១៩ បានកត់សម្គាល់ដល់ខេត្តចំនួន ១៧ ដែលជាតំបន់សាកល្បងទេសចរណ៍ ដែលក្នុងនោះខេត្តចំនួន ៤ ដូចជាខេត្ត Krabi ខេត្ត Phang Nga ខេត្តភូកេត ក៏ដូចជាទីក្រុងបាងកក ត្រូវបានបើកឡើងវិញទាំងស្រុង ។

លោកបាននិយាយថា “ប្រជាពលរដ្ឋ​គួរ​ចៀសវាង​ការ​ពិសា​គ្រឿង​ស្រវឹង​នៅ​តាម​ទី​សាធារណៈ ព្រោះ​អាច​ជា​ការ​ធ្វេសប្រហែស​ ។ ប្រជាពលរដ្ឋគួរតែគោរពតាមវិធានការទប់ស្កាត់ការឆ្លងមេរោគ ដូចជារក្សាគម្លាត លាងដៃឲ្យបានទៀងទាត់ និងពាក់ម៉ាស់ បើទោះជាមនុស្សភាគច្រើនបានទទួលការចាក់វ៉ាក់សាំងពេញលេញក៏ដោយ” ។

លោកបញ្ជាក់ថា “ទន្ទឹមនឹងនោះ ប្រតិបត្តិករទីកន្លែងនានាគួរតែប្រកាន់ខ្ជាប់យ៉ាងតឹងរ៉ឹងនូវគោលការណ៍កំណត់ គ្មានកូវីដ ដើម្បីធានាថាមិនមានការឆ្លងមេរោគ” ។

គួរបញ្ជាក់ថា គិតត្រឹមថ្ងៃចន្ទនេះ ភោជនីយដ្ឋាននានាត្រូវបានអនុញ្ញាតឲ្យបម្រើភេសជ្ជៈមានជាតិអាល់កុលរហូតដល់ម៉ោង ៩ យប់ ខណៈកន្លែង​កម្សាន្ត ហាង​ស្រា បារ និង​ហាង​ខារ៉ាអូខេ នឹង​ត្រូវ​បើក​វិញ​ក្នុង​ដំណាក់កាល​បន្ទាប់ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ ថៃ រកវិធីតភ្ជាប់ជាមួយផ្លូវដែក ឡាវ-ចិន ទាញភ្ញៀវទេសចរចូលប្រទេស