ទឹកជំនន់​​ធ្ងន់ធ្ងរ​នៅទី​ក្រុង​ម៉ានីល ប្រទេស ហ្វីលីពីនបង្ខំឲ្យជម្លៀសមនុស្ស​រាប់​ពាន់​នាក់​

ភ្លៀងធ្លាក់ខ្លាំងដោយសារព្យុះទីហ្វុងវីពផា បានបណ្តាលឱ្យមានទឹកជំនន់យ៉ាងធ្ងន់ធ្ងរនៅក្នុងទីក្រុងម៉ានីល ប្រទេសហ្វីលីពីន ដោយបង្ខំឱ្យមនុស្សជាង ៤៨,០០០ នាក់ជម្លៀសចេញ និងបណ្តាលឱ្យមនុស្សពីរនាក់បាត់ខ្លួន។ នេះបើយោងតាមការចេញផ្សាយរបស់សារព័ត៌មាន​CNA នៅថ្ងៃទី២២ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទឹកទន្លេ Marikina បានហក់ឡើងបន្ទាប់ពីមានភ្លៀងធ្លាក់ខ្លាំងមួយយប់ ដោយបានជន់លិចតំបន់ទំនាបក្បែរនោះ និងជំរុញឱ្យមានការបិទសាលារៀន និងការិយាល័យរដ្ឋាភិបាលមួយចំនួន។

មនុស្សត្រូវបានជម្លៀសចេញពីទីក្រុង Marikina, Quezon, និង Caloocan ។ នៅទីក្រុង Caloocan ស្ត្រីចំណាស់ម្នាក់ និងអ្នកបើកបររបស់គាត់បានបាត់ខ្លួន បន្ទាប់ពីរថយន្តរបស់ពួកគេត្រូវបានទឹកជំនន់ហូរនាំចូលព្រែក។ រថយន្ត​នោះ​ត្រូវ​បាន​រក​ឃើញ ប៉ុន្តែ​ក្រុម​អ្នក​ជួយ​សង្គ្រោះ​កំពុង​តែ​ស្វែង​រក​ពួក​គេ​នៅ​ឡើយ​។

បើទោះជាទឹកជំនន់ចាប់ផ្តើមស្រកវិញនៅព្រឹកថ្ងៃអង្គារក៏ដោយ ក៏មនុស្សជាច្រើននៅតែត្រូវជម្លៀសចេញ។ចាប់តាំងពីព្យុះទីហ្វុងវីពផា បានបោកបកឆ្លងកាត់កាលពីថ្ងៃសុក្រ នៅទូទាំងប្រទេសហ្វីលីពីន ភ្លៀងធ្លាក់មូសុងដែលកំពុងបន្តបានសម្លាប់មនុស្សយ៉ាងហោចណាស់ ៣ នាក់ និងបាត់ខ្លួន ៧ នាក់។

គួរបញ្ជាក់ថាប្រទេសហ្វីលីពីន ដែលជារឿយៗរងការវាយប្រហារដោយព្យុះប្រហែល ២០ ក្នុងមួយឆ្នាំ ប្រឈមនឹងការកើនឡើងនៃឥទ្ធិពលព្យុះដោយសារតែការប្រែប្រួលអាកាសធាតុ ដោយសហគមន៍ក្រីក្របំផុតប្រឈមនឹងហានិភ័យជាងគេ៕

អត្ថបទ៖ ប៊ុន សុភាព