ទីក្រុងមួយនៅ ចិន តេស្តរកកូវីដលើអ្នកទស្សនា ៣ ម៉ឺននាក់ ឯលទ្ធផលមិនខុសបំណង

ទីក្រុង Chengdu ភាគនិរតីនៃប្រទេសចិនបាននិយាយនៅថ្ងៃពុធនេះថា ខ្លួនបានធ្វើតេស្ដរកកូវីដលើអ្នកទស្សនាចំនួន ៣០,០០០ នាក់នៅមជ្ឈមណ្ឌលកម្សាន្តដ៏ធំមួយ អំឡុងថ្ងៃទីពីរនៃការត្រួតពិនិត្យទ្រង់ទ្រាយធំនៅក្នុងទីក្រុង ។

ទូរទស្សន៍កណ្តាលចិន (CCTV) បានរាយការណ៍កាលពីថ្ងៃអង្គារថា ការធ្វើតេស្តរកកូវីដលើអ្នកទស្សនាទាំងនោះ ជាលទ្ធផលគឺអវិជ្ជមានទាំងអស់ ។

អាជ្ញាធរក្នុងតំបន់នៅទីក្រុង Chengdu បាននិយាយនៅក្នុងសេចក្តីជូនដំណឹងមួយថា អ្នកដែលមានវត្តមានទាំងនោះត្រូវបានតម្រូវឲ្យត្រឡប់ទៅផ្ទះវិញ ដើម្បីរង់ចាំលទ្ធផលរបស់ពួកគេ ហើយមិនត្រូវចេញក្រៅផ្ទះនោះទេ រហូតដល់មានការណែនាំ ។

វាមិនច្បាស់ទេថាតើមានអ្នកទស្សនាប៉ុន្មាននាក់នៅមជ្ឈមណ្ឌល New Century Global Center ទំហំ ១.៧ លានម៉ែត្រការ៉េ ដែលមានហាងជាច្រើន ការិយាល័យ សួនទឹកដ៏ធំ និងសាកលវិទ្យាល័យមួយនេះ ។CCTV បាននិយាយថា មនុស្សមួយចំនួនបានចាកចេញពីតំបន់គ្រប់គ្រងបណ្តោះអាសន្ន ដោយគ្មានការអនុញ្ញាត ប៉ុន្តែត្រូវបានគេរកឃើញតាមរយៈសេវាកម្មតាមដាន និងធ្វើតេស្ត ។

ទន្ទឹមនោះ ការធ្វើតេស្តទ្រង់ទ្រាយធំនេះ ត្រូវបានធ្វើឡើងនៅឧទ្យាន Shanghai Disneyland កាលពីចុងខែតុលា ដោយភ្ញៀវនៅក្នុងឧទ្យានតម្រូវឲ្យធ្វើតេស្តរកកូវីដនៅច្រកចេញ នៅពេលពួកគេចាកចេញ ។

គួរបញ្ជាក់ថា Chengdu ជាទីក្រុងដែលមានប្រជាជនជាង ២០ លាននាក់ បានរកឃើញករណីឆ្លងកូវីដក្នុងសហគមន៍មួយចំនួនក្នុងរយៈពេលប៉ុន្មានថ្ងៃថ្មីៗនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ចិន ផ្ទុះកំហឹងលើ អាមេរិក ក្រោយយន្តហោះយោធាចុះចតនៅ តៃវ៉ាន់ ទាំងដែលគ្មានទំនាក់ទំនងការទូត