ព័ត៌មានអន្ដរជាតិ

WHO បញ្ជាក់៖ វ៉ាក់សាំងអាចកាត់បន្ថយការឆ្លងកូវីដ៤០%ប៉ុណ្ណោះ មិនត្រូវភ្លេចការពារខ្លួន

បានផុស

៥ years មុន

នៅ

ថ្ងៃព្រហស្បតិ៍ ២៥ វិច្ឆិកា ២០២១

ដោយ

កាលពីថ្ងៃពុធ ទី២៤ ខែវិច្ឆិកានេះ អង្គការសុខភាពពិភពលោក (WHO) បានបញ្ជាក់ហើយថា វ៉ាក់សាំងអាចកាត់បន្ថយការឆ្លងកូវីដ-១៩ជាពិសេសវីរុសបំប្លែងឆ្លងលឿន Delta បានប្រហែលជា៤០%ប៉ុណ្ណោះ និងបានព្រមានថា អ្នកចាក់វ៉ាក់សាំងរួចមិនត្រូវមានអារម្មណ៍សុវត្ថិភាពទាំងស្រុងឡើយ។

អគ្គលេខាធិការអង្គការសុខភាពពិភពលោក លោក Tedros Adhanom Ghebreyesus បាននិយាយថា មនុស្សដែលបានចាក់វ៉ាក់សាំងជាច្រើនកំពុងគិតខុសពីការចាក់វ៉ាក់សាំងលែងធ្វើឲ្យពួកគេត្រូវការប្រុងប្រយ័ត្នទៀតហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Tedros ទទួចថា អ្នកចាក់វ៉ាក់សាំងគ្រប់ដូសត្រូវតែប្រកាន់ភ្ជាប់វិធានការការពារដដែលដើម្បីជៀសវាងការឆ្លងវីរុសកូវីដ។ ចំពោះវីរុសបំប្លែងខ្លួនឆ្លងលឿនរហ័ស Delta គឺវ៉ាក់សាំងមិនមានប្រសិទ្ធភាពប្រឆាំងខ្ពស់នោះទេ។

លោក Tedros មានប្រសាសន៍ថា ៖«យើងបារម្ភអំពីអារម្មណ៍ខុសពីសុវត្ថិភាពដែលវ៉ាក់សាំងបញ្ចប់កូវីដ-១៩ ហើយប្រជាជនដែលបានចាក់វ៉ាក់លែងត្រូវការវិធានការការពារខ្លួនផ្សេងៗទៀត។ វ៉ាក់សាំងអាចរក្សាជីវិតបាន ប៉ុន្តែពួកគេមិនអាចការពារពីការចម្លងបានទាំងស្រុងនោះទេ»។

លោកបន្តថា ៖«ទិន្នន័យបានបង្ហាញថា មុនពេលវីរុសបំប្លែង Delta មកដល់ វ៉ាក់សាំងអាចកាត់បន្ថយការឆ្លងបានប្រហែលជា៦០%។ ពេល Delta រាតត្បាតឡើង ប្រសិទ្ធភាពវ៉ាក់សាំងការពារមិនឲ្យឆ្លងបានធ្លាក់មកសល់ប្រហែលជា៤០%ប៉ុណ្ណោះ»។

វីរុសបំប្លែងខ្លួន Delta ឥឡូវនេះនៅតែកំពុងគ្របដណ្តប់ទូទាំងពិភពលោកដដែរ។

លោក Tedros បានបញ្ជាក់ថា ៖«ប្រសិនបើអ្នកបានចាក់វ៉ាក់សាំងរួចហើយ អ្នកមានហានិភ័យទាបខ្លាំងដែលបណ្តាលឲ្យឈឺធ្ងន់ និងស្លាប់ ប៉ុន្តែអ្នកនៅតែប្រឈមហានិភ័យនៃការឆ្លងកូវីដ និងចម្លងទៅអ្នកដទៃដដែល»។

«យើងមិនអាចនិយាយចំណុចនេះឲ្យច្បាស់គ្រប់គ្រាន់នោះទេ បើទោះជាអ្នកចាក់វ៉ាក់សាំងរួច អ្នកត្រូវតែកុំធ្វេសប្រហែស បន្តការពារខ្លួនកុំឲ្យឆ្លង និងចម្លងទៅអ្នកដទៃ»។ លោកបានបញ្ជាក់ និងបន្ថែមថា អ្នកត្រូវពាក់ម៉ាស់ រក្សាគម្លាតសង្គម ជៀសវាងទៅកន្លែងមនុស្សច្រើន និងជួបជុំនៅខាងក្រៅ៕

ប្រែសម្រួល៖ វីរបុត្រ
ប្រភព៖ AFP

Related Topics:កូវីដ-១៩