២ ឆ្នាំហើយដែល WHO ប្រកាសអាសន្នពីកូវីដ (មានវីដេអូ)

រហូតមកដល់ពេលនេះពិភពលោកបានជួបប្រទះនឹងការឆ្លងវីរុសកូវីដ ១៩ រាប់លានករណី ចាប់តាំងពីអង្គការសុខភាពពិភពលោក (WHO) បានប្រកាសអាសន្នពីវីរុសនេះកាលពី ២ ឆ្នាំមុន ខណៈបច្ចុប្បន្នប្រទេសមួយចំនួនកំពុងផ្លាស់ប្តូរដើម្បីបន្ធូរបន្ថយការរឹតត្បិតក្នុងកិច្ចខិតខំប្រឹងប្រែងដើម្បីរស់នៅជាមួយមេរោគនេះ ។

WHO បានប្រកាសកាលពីថ្ងៃទី ៣០ ខែមករា ឆ្នាំ ២០២០ ថា ការផ្ទុះឡើងនៃវីរុសកូវីដ ១៩ គឺជាភាពអាសន្នផ្នែកសុខភាពសាធារណៈ និងជាការព្រួយបារម្ភជាអន្តរជាតិ ។

ទិន្នន័យចងក្រងដោយសាកលវិទ្យាល័យ Johns Hopkins នៅសហរដ្ឋអាមេរិកបង្ហាញថា មនុស្សជាង ៣៧៥ លាននាក់នៅទូទាំងពិភពលោកបានឆ្លងវីរុសនេះ ហើយមនុស្សប្រហែល ៥.៧ លាននាក់បានស្លាប់ ដោយសារកូវីដ ១៩ ចាប់តាំងពីការប្រកាសនេះ ខណៈវីរុសបំប្លែងខ្លួនថ្មីក៏បានលេចឡើងជាបន្តបន្ទាប់ និងបណ្តាលឲ្យមានរលកនៃការឆ្លងជាច្រើន ។

អគ្គនាយក WHO លោក Tedros Adhanom Ghebreyesus បានព្រមានថា វីរុសបំប្លែងខ្លួនអូមីក្រុងកំពុងរីករាលដាលក្នុងល្បឿនមិនគួរឲ្យជឿនៅទូទាំងពិភពលោក ហើយការកម្ចាត់ជំងឺរាតត្បាតគឺនៅឆ្ងាយណាស់ ។

បច្ចុប្បន្នអូមីក្រុងបានបណ្តាលឲ្យមានការខ្វះខាតអ្នកធ្វើការយ៉ាងធ្ងន់ធ្ងរនៅក្នុងវិស័យផ្សេងៗ និងបានជំរុញឲ្យរដ្ឋាភិបាលមួយចំនួន រួមទាំងអ្នកនៅក្នុងសហរដ្ឋអាមេរិក និងចក្រភពអង់គ្លេស កាត់បន្ថយរយៈពេលធ្វើចត្តាឡីស័កជាដើម ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ WHO ថា ត្រឹម អូមីក្រុង មិនចាំបាច់បង្កើតវ៉ាក់សាំងថ្មីទេ