រំលោភសិស្សក្រីក្រ ១៣ នាក់ គ្រូបង្រៀន ឥណ្ឌូណេស៊ី ជាប់គុកមួយជីវិត

តុលាការឥណ្ឌូណេស៊ីនៅថ្ងៃអង្គារនេះបានកាត់ទោសគ្រូបង្រៀនម្នាក់ឲ្យជាប់គុកអស់មួយជីវិតពីបទរំលោភលើសិស្សសាលា ១៣ នាក់ ។

តុលាការស្រុក Bandung ក្នុងខេត្ត West Java បានរកឃើញថា លោក Herry Wirawan មានទោសពីបទរំលោភសិស្សស្រីចំនួន ១៣ នាក់ ពោលជាអនីតិជនទាំងអស់ និងបានបង្ខាំងមនុស្សយ៉ាងតិច ៨នាក់ក្នុងចំណោមពួកគេទាំងនោះ ។

លោក Wirawan អាយុ ៣៦ ឆ្នាំបានមកដល់តុលាការទាំងដៃជាប់ខ្នោះ និងឱនក្បាលចុះ ហើយក្នុងអំឡុងពេលសវនាការ គ្រូបង្រៀនរូបនេះបានសារភាពថា បានរំលោភកុមារជាច្រើននាក់មកពីគ្រួសារក្រីក្រដែលបានចូលរៀននៅសាលា ដោយសារទទួលបានអាហារូបករណ៍ក្នុងរយៈពេល ៥ ឆ្នាំ ។

ទន្ទឹមនោះ ចៅក្រមលោក Yohannes Purnomo Suryo Adi បានកាត់ទោសគាត់ឲ្យជាប់គុកអស់មួយជីវិត ខណៈជនជាប់ចោទ​បាន​សុំ​ចៅក្រម​ឲ្យ​បន្ធូរបន្ថយទោស ដោយសារ​គាត់ត្រូវ​ចិញ្ចឹម​កូន ។

ការរំលោភបំពានបានកើតឡើង នៅពេលដែលក្រុមគ្រួសាររបស់សិស្សស្រីម្នាក់បានរាយការណ៍ពីករណីលោក Wirawan ទៅកាន់ប៉ូលិសពីបទរំលោភ និងធ្វើឲ្យកូនស្រីជំទង់របស់ពួកគេមានកូនកាលពីឆ្នាំមុន ។

ការលាតត្រដាងនេះបានធ្វើឲ្យមានការខឹងសម្បារយ៉ាងខ្លាំងដល់ប្រទេសជាតិ ហើយមន្ត្រីរដ្ឋាភិបាលជាន់ខ្ពស់មួយរូបបាននិយាយថា ប្រធានាធិបតីលោក Joko Widodo បានយកចិត្តទុកដាក់ជាពិសេសចំពោះករណីនេះ ។

គួរបញ្ជាក់ថា ករណី​រំលោភ​សេពសន្ថវៈ​នៅ​ស្រុក Bandung បាន​បង្ហាញ​ពី​បញ្ហា​នៃ​ការ​រំលោភ​បំពាន​ផ្លូវ​ភេទ​នៅ​តាម​សាលារៀន ដោយ​ករណីចំនួន ១៤ ក្នុង​ចំណោម ១៨ ករណី​ត្រូវ​បាន​រាយការណ៍​ទៅ​គណៈកម្មការ​ការពារ​កុមារ​ជាតិ​កាលពី​ឆ្នាំ​មុន គឺ​ប្រព្រឹត្ត​ទៅ​នៅ​ក្នុងសាលារៀនអាហារូបករណ៍ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ប្រទេសមួយនៅ អាស៊ាន​ ទិញ​យន្តហោះ​ចម្បាំង​ ៤២ គ្រឿងពី បារាំង