មកទៀតហើយ ប្រទេសមួយនៅ អឺរ៉ុប រកឃើញ វីរុសកូវីដបំប្លែងខ្លួនប្រភេទថ្មី មិនស្គាល់ឈ្មោះ

ក្រសួងសុខាភិបាលរបស់អ៊ីស្រាអែលបានប្រកាសពីការរកឃើញករណីកូវីដបំប្លែងខ្លួនប្រភេទថ្មីមួយទៀតដែលមិនស្គាល់ឈ្មោះចំនួន ២ ករណី ។

កាសែត Jerusalem Post បានរាយការណ៍ថា យោងតាមក្រសួង ករណីទាំងពីរនេះត្រូវបានរកឃើញ ក្នុងអំឡុងពេលធ្វើតេស្តម៉ាស៊ីនធំ PCR ជាប្រចាំដែលធ្វើឡើងនៅអាកាសយានដ្ឋានអន្តរជាតិ Ben Gurion សម្រាប់អ្នកដំណើរទាំងអស់ដែលចូលមកក្នុងប្រទេស ។

ក្រសួង​បាន​បន្ត​ថា អ្នកដែលឆ្លងមេរោគនេះត្រូវបានគេរាយការណ៍ថាកំពុងមានរោគសញ្ញាស្រាល រួមមានគ្រុនក្តៅ ឈឺក្បាល និងឈឺសាច់ដុំ ហើយក្រសួង​កំពុង​បន្ត​តាម​ដាន​ស្ថានការណ៍​នៅ​អាកាសយានដ្ឋាន ហើយ​នឹង​ផ្តល់​ព័ត៌មាន​បន្ថែម បើមានករណីស្រដៀងគ្នានេះ ។

ចំណែកអ្នកនាំពាក្យមកពីមជ្ឈមណ្ឌលវេជ្ជសាស្ត្រ Shamir Assaf Harofeh ជាកន្លែងដែលការធ្វើតេស្ត PCR ត្រូវបានធ្វើឡើងជាបន្តបន្ទាប់បាននិយាយនៅក្នុងសេចក្តីថ្លែងការណ៍មួយថា “ការវិភាគទិន្នន័យបានបង្ហាញឲ្យឃើញហ្សែនមួយនៃវីរុសថ្មីនេះ ពោលអាចជាការរួមបញ្ចូលគ្នានៃវីរុសបំបាំងកាយទម្រង់ BA.1 និង BA.2 ដែលក្លាយចេញពីវីរុសបំប្លែងខ្លួនអូមីក្រុង ។

អ្នកនាំពាក្យមជ្ឈមណ្ឌលខាងលើសង្កត់ធ្ងន់ថា ដោយសារវីរុសបំប្លែងខ្លួនថ្មីនេះមិនទាន់ត្រូវបានរកឃើញនៅកន្លែងណាផ្សេងទៀតក្នុងពិភពលោក ដូច្នេះមិនសូវមានគេស្គាល់ច្រើនអំពីវានោះទេ ។ ប៉ុន្តែ​វេជ្ជបណ្ឌិត​ជាន់ខ្ពស់​នៃ​មជ្ឈមណ្ឌល​វេជ្ជសាស្ត្រ Hadassah គឺលោកសាស្ត្រាចារ្យ​ Dror Mevorach បាន​និយាយ​ថា “​រៀងរាល់ ២ ​ទៅ​ ៣ ​សប្តាហ៍តែងតែមានវីរុសបំប្លែងខ្លួនថ្មីមួយ“ ។

ជាចុងក្រោយលោក Mevorach បញ្ជាក់ថា “ដរាបណាវាមិនទាន់បង្កើតជាការឆ្លងថ្មី វានឹងមិនត្រូវបានកំណត់ថាជាវីរុសបំប្លែងខ្លួនគួរព្រួយបារម្ភ និងត្រូវយកចិត្តទុកដាក់នោះទេ” ៕

ប្រែសម្រួលដោយ ៖ ជីវ័ន្ត

ប្រភព ៖ The Tribune

ចុចអាន ៖ មកដឹង អាវុធសាហាវៗមួយចំនួនដែល រុស្ស៊ី និងអ៊ុយក្រែន កំពុងប្រើក្នុង សង្គ្រាម ពេលនេះ