អាមេរិក ឲ្យប្រទេសទាំងអស់កុំធ្វើប្រតិបត្តិការអាវុធទ្រង់ទ្រាយធំជាមួយ រុស្ស៊ី

រដ្ឋមន្ត្រីការបរទេសអាមេរិកលោក Antony Blinken បាននិយាយក្នុងអំឡុងសន្និសីទសារព័ត៌មានមួយ បន្ទាប់ពីជួបជាមួយមន្ត្រីកំពូលឥណ្ឌាថា សហរដ្ឋអាមេរិកកំពុងអំពាវនាវឲ្យប្រទេសទាំងអស់កុំធ្វើប្រតិបត្តិការអាវុធទ្រង់ទ្រាយធំជាមួយរុស្ស៊ី ។

នៅពេលត្រូវបានសួរថាតើទីក្រុងវ៉ាស៊ីនតោនកំពុងពិចារណាដាក់ទណ្ឌកម្មលើប្រទេសឥណ្ឌាលើការទិញប្រព័ន្ធខែលការពារដែនអាកាស S-400 ឬយ៉ាងណានោះ លោក Blinken បាននិយាយថា “យើងបន្តជំរុញឲ្យប្រទេសទាំងអស់ចៀសវាងប្រតិបត្តិការទ្រង់ទ្រាយធំថ្មីលើប្រព័ន្ធអាវុធរុស្ស៊ី ជាពិសេសចំពោះអ្វីដែលរុស្ស៊ីកំពុងធ្វើចំពោះអ៊ុយក្រែន” ។

លោក Blinken បញ្ជាក់ថា “បច្ចុប្បន្នយើងមិនទាន់បានធ្វើការប្តេជ្ញាចិត្តទាក់ទងនឹងការដាក់ទណ្ឌកម្មដែលអាចកើតមាន ឬការលើកលែងដែលមានសក្តានុពលនៅក្រោមច្បាប់ CAATSA នៅឡើយទេ” ។

កន្លងមក យោធាឥណ្ឌាប្រើប្រាស់អាវុធជាច្រើនប្រភេទដែលផលិតដោយរុស្ស៊ី រួមទាំងប្រព័ន្ធមីស៊ីល រថក្រោះ និងកាំភ្លើងធំ ហើយបានចុះហត្ថលេខាលើកិច្ចព្រមព្រៀងបន្ថែម រួមទាំងការទិញប្រព័ន្ធខែលការពារដែនអាកាស S-400 របស់រុស្ស៊ីផងដែរ ។

ស្របពេលជាមួយគ្នានេះ ឥណ្ឌាក៏បានប្រកាន់ជំហរអព្យាក្រឹតក្នុងជម្លោះដែលកំពុងបន្តរវាងរុស្ស៊ី និងសហរដ្ឋអាមេរិក រួមជាមួយសម្ព័ន្ធមិត្តរបស់ខ្លួនទាក់ទងនឹងប្រតិបត្តិការយោធាពិសេសរបស់ទីក្រុងមូស្គូក្នុងប្រទេសអ៊ុយក្រែន ហើយបានបដិសេធមិនចូលរួមជាមួយលោកខាងលិចក្នុងការដាក់ទណ្ឌកម្មប្រឆាំងនឹងរុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ជម្លោះ រុស្ស៊ី-អ៊ុយក្រែន នឹងធ្វើឲ្យណាតូកើនសមាជិកពី ៣០ ទៅ ៣២ ប្រទេស