រុស្ស៊ី ហាមលោក Johnson និងមន្ត្រីអង់គ្លេស ១៣រូបទៀត មិនឲ្យជាន់ដីរបស់ខ្លួន

នាយករដ្ឋមន្ត្រីអង់គ្លេសលោក Boris Johnson ត្រូវបានរុស្ស៊ីហាមឃាត់មិនឲ្យចូលប្រទេស ជុំវិញគោលជំហរអរិភាព របស់ចក្រភពអង់គ្លេសចំពោះសង្គ្រាមនៅអ៊ុយក្រែន។

ក្រសួងការបរទេសរុស្ស៊ីបាននិយាយថា រដ្ឋមន្ត្រីការបរទេស Liz Truss, អតីតនាយករដ្ឋមន្ត្រី Theresa May និងរដ្ឋមន្ត្រីទីមួយនៃប្រទេសស្កុតឡែន Nicola Sturgeon ស្ថិតក្នុងចំណោមសមាជិករដ្ឋាភិបាលអង់គ្លេស និងអ្នកនយោបាយទាំង ១៣នាក់ ដែលត្រូវបានហាមឃាត់មិនឲ្យចូលប្រទេស។

វិធានការនេះត្រូវបានធ្វើឡើង ដោយមើលឃើញពីសកម្មភាពអរិភាពដែលមិនធ្លាប់មានពីមុនមករបស់រដ្ឋាភិបាលអង់គ្លេស ជាពិសេសការដាក់ទណ្ឌកម្មប្រឆាំងនឹងមន្ត្រីជាន់ខ្ពស់រុស្ស៊ី។ ក្រសួងបន្ថែមថា ខ្លួននឹងពង្រីកបញ្ជីហាមឃាត់ក្នុងពេលឆាប់ៗនេះ។

គួរបញ្ជាក់ថា រុស្ស៊ីបានហាមប្រាមប្រធានាធិបតីអាមេរិក Joe Biden និងមន្ត្រីអាមេរិកមួយចំនួនទៀតមិនឲ្យចូលក្នុងប្រទេសរបស់ខ្លួន រួចទៅហើយ៕

ប្រែសម្រួល៖ សន្យា

ប្រភព៖ BBC

ចុចអាន៖ រុស្ស៊ី ជំរុញកងកម្លាំងអ៊ុយក្រែនកំពុងប្រយុទ្ធនៅ Mariupol ទម្លាក់អាវុធចុះ