ព័ត៌មានអន្ដរជាតិ

ប្រទេសក្បែរខាងកម្ពុជាផ្ដល់ជំនួយមនុស្សធម៌ ៥០ ម៉ឺនដុល្លារដល់ អ៊ុយក្រែន

បានផុស

៣ years មុន

នៅ

ថ្ងៃចន្ទ ២ ឧសភា ២០២២

ដោយ

នាយករដ្ឋមន្ត្រីវៀតណាមលោក Pham Minh Chinh បាននិយាយកាលពីថ្ងៃអាទិត្យថា ប្រទេសវៀតណាមនឹងផ្តល់ជំនួយមនុស្សធម៌ចំនួន ៥០០,០០០ ដុល្លារអាមេរិកដល់ប្រទេសអ៊ុយក្រែនដែលកំពុងហែកហួរដោយសង្គ្រាម ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេហទំព័ររដ្ឋាភិបាលវៀតណាមបានរាយការណ៍ថា លោក Pham Minh Chinh បានប្រកាសផ្ដល់ជំនួយនេះនៅក្នុងសន្និសីទសារព័ត៌មានមួយដែលបានធ្វើឡើងកាលពីថ្ងៃអាទិត្យ បន្ទាប់ពីលោកបានជួបពិភាក្សាជាមួយនាយករដ្ឋមន្រ្តីជប៉ុនលោក Fumio Kishida ដែលបានមកដល់ទីក្រុងហាណូយ ក្នុងដំណើរទស្សនកិច្ចផ្លូវការរយៈពេល ២ ថ្ងៃតាមការអញ្ជើញរបស់លោកនាយករដ្ឋមន្ត្រីវៀតណាមរូបនេះ ។

លោកនាយករដ្ឋមន្ត្រី Pham Minh Chinh បានអះអាងថា វៀតណាមមានឆន្ទៈក្នុងការរួមចំណែកយ៉ាងសកម្មក្នុងប្រតិបត្តិការសង្គ្រោះមនុស្សធម៌ ដំណើរការការទូត កិច្ចសន្ទនា និងការចរចាទាក់ទងនឹងវិបត្តិនៅអ៊ុយក្រែន ជាពិសេសវៀតណាមនឹងផ្តល់ជំនួយមនុស្សធម៌ចំនួន ៥០០,០០០ ដុល្លារដល់អ៊ុយក្រែន តាមរយៈអង្គការមនុស្សធម៌អន្តរជាតិ ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោកប្រធានាធិបតី វ្ល៉ាឌីមៀ ពូទីន ហៅថាជា “ប្រតិបត្តិការយោធាពិសេស” បានអូសបន្លាយពេលជាង ២ ខែមកហើយ បន្ទាប់ពីទីក្រុងមូស្គូបានចាប់ផ្ដើមការវាយប្រហារលើទីក្រុងកៀវកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ រុស្ស៊ី ថា ណាតូលែងស័ក្តិសមនឹងអាមេរិកហើយ ដោយសារស្ថានការណ៍នៅ អ៊ុយក្រែន