គីម ជុងអ៊ុន បញ្ជាឲ្យយោធាធ្វើសកម្មភាពខ្លាំងក្លា ខណៈស្ថានភាពកូវីដ កាន់តែធ្ងន់ធ្ងរ

មេដឹកនាំកូរ៉េខាងជើងលោក គីម ជុងអ៊ុន បានបញ្ជាឲ្យយោធា ធ្វើសកម្មភាពឲ្យខ្លាំងក្លាក្នុងការផ្គត់ផ្គង់ថ្នាំពេទ្យនៅទីក្រុងព្យុងយ៉ាង ប៉ុន្មានថ្ងៃបន្ទាប់ពីការប្រកាសបិទខ្ទប់ដោយសារផ្ទុះកូវីដ។

កាលពីសប្តាហ៍មុន កូរ៉េខាងជើងបានទទួលស្គាល់ជាលើកដំបូងថា ខ្លួនកំពុងប្រយុទ្ធប្រឆាំងនឹងការផ្ទុះឡើងនៃជំងឺកូវីដ១៩ ដោយអ្នកជំនាញបានលើកឡើងពីការព្រួយបារម្ភថា មេរោគនេះអាចបំផ្លិចបំផ្លាញប្រទេសមួយដែលការផ្គត់ផ្គង់ផ្នែកវេជ្ជសាស្រ្តនៅមានកម្រិត និងមិនមានកម្មវិធីចាក់វ៉ាក់សាំង។

យោងតាមទីភ្នាក់ងារសារព័ត៌មានរដ្ឋ, ប្រទេសនេះបានរាយការណ៍ថា មនុស្សចំនួន ៣៩២ ៩២០នាក់ទៀតមានចេញរោគសញ្ញាគ្រុនក្តៅ ហើយមានការស្លាប់ថ្មីចំនួន ៨ នាក់។

ទោះបីជាយ៉ាងណាក៏ដោយ កូរ៉េខាងជើងមិនបានរាយការណ៍ទេថាតើ ក្នុងចំណោមករណីទាំងនោះ មានប៉ុន្មាននាក់ដែលចេញលទ្ធផលវិជ្ជមានកូវីដ។

លោក គីម ជុងអ៊ុន លើកឡើងថា មូលហេតុដែលបណ្តាលឲ្យមានមនុស្សស្លាប់ច្រើនបែបនេះ គឺដោយសារតែប្រជាជនធ្វេសប្រហែសក្នុងការប្រើថ្នាំធម្មតា កង្វះចំណេះដឹង និងការយល់ដឹងអំពីមេរោគអូមីក្រុងបំបាំងកាយ និងវិធីព្យាបាលត្រឹមត្រូវ។

កូរ៉េខាងជើង​មិនមាន​វ៉ាក់សាំង​ការពារ​កូវីដ​ ថ្នាំ​ព្យាបាល​ប្រឆាំង​មេរោគកូវីដ ឬ​សមត្ថភាព​ធ្វើតេស្ត​ទ្រង់ទ្រាយធំ​នៅឡើយទេ។

ប្រព័ន្ធផ្សព្វផ្សាយរដ្ឋរាយការណ៍ថា មនុស្សចំនួន៥០នាក់បានបាត់បង់ជីវិតរួចទៅហើយ ហើយកម្មករជាងមួយលាននាក់ត្រូវបានដាក់ពង្រាយ ដើម្បីបញ្ឈប់ការរីករាលដាល៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖​ គីម ជុងអ៊ុន ប្រកាសស្ថានភាពកូវីដ ថាជា “មហាគ្រោះមហន្តរាយ” ខណៈ ២ថ្ងៃ មានអ្នកស្លាប់២១នាក់