លោក Joe Biden និងភរិយា ត្រូវជម្លៀសចេញពីផ្ទះភ្លាមៗ 

ប្រធានាធិបតីសហរដ្ឋអាមេរិក លោក Joe Biden និងជំទាវទីមួយ Jill Biden ត្រូវបានជម្លៀសចេញពីផ្ទះឆ្នេរសមុទ្រក្នុងទីក្រុង Rehoboth Beach នៃរដ្ឋ Delaware បន្ទាប់ពីយន្តហោះធុនតូចមួយគ្រឿង បានហោះចូលក្នុងដែនអាកាសដែលត្រូវបានរឹតបន្តឹងនៅជិតនោះ។

ចាប់ពីពេលនោះមក អ្នកទាំង២ បានត្រលប់ទៅវិញដោយសុវត្ថិភាព ដោយមិនមានការគំរាមកំហែងជាក់ស្តែងណាមួយឡើយ។ នេះបើយោងតាមសេតវិមាន។

មន្ត្រីសេតវិមានបានប្រាប់ក្រុមអ្នកសារព័ត៌មានថា “យន្តហោះឯកជនធុនតូចមួយគ្រឿង បានហោះចូលទៅក្នុងដែនអាកាសដែលមានការរឹតបន្តឹង វិធានការប្រុងប្រយ័ត្នទាំងអស់ត្រូវបានធ្វើឡើង។ មិនមានការគំរាមកំហែងដល់ប្រធានាធិបតី ឬក្រុមគ្រួសាររបស់គាត់ទេ”។

ស្របពេលជាមួយគ្នានោះ លោក Anthony Guglielmi ប្រធានផ្នែកទំនាក់ទំនងសម្រាប់សេវាសម្ងាត់អាមេរិក ក៏បាននិយាយផងដែរថា យន្តហោះបានចូលទៅក្នុងដែនអាកាសលើឆ្នេរ Rehoboth ដោយកំហុស។

លោកបាននិយាយនៅក្នុងសេចក្តីថ្លែងការណ៍មួយថា “យន្តហោះត្រូវបានបណ្តេញភ្លាមៗ ចេញពីដែនអាកាសដែលរឹតបន្តឹង។ ការស៊ើបអង្កេតបឋមបង្ហាញថា អាកាសយានិក មិនមានប៉ុស្តិ៍វិទ្យុត្រឹមត្រូវ, មិនបានធ្វើតាម NOTAMS (សេចក្តីជូនដំណឹងដល់អាកាសយានិក) ដែលត្រូវបានដាក់ និងមិនបានអនុវត្តតាមការណែនាំអំពីការហោះហើរ។ សេវាសម្ងាត់សហរដ្ឋអាមេរិកនឹងកំពុងសម្ភាសន៍អ្នកបើកយន្តហោះ”៕

ប្រែសម្រួល៖ Vann Vann

ប្រភព៖ NRP

ចុចអាន៖ លោក Joe Biden ទៅដល់ប្រទេស កូរ៉េខាងត្បូងហើយ