លោក Joe Biden ទៅដល់ប្រទេស កូរ៉េខាងត្បូងហើយ

ប្រធានាធិបតីអាមេរិកលោក Joe Biden បានទៅដល់ប្រទេសកូរ៉េខាងត្បូងហើយ នៅថ្ងៃសុក្រទី២០ខែឧសភានេះ សម្រាប់កិច្ចប្រជុំកំពូលលើកដំបូងរបស់គាត់ ជាមួយលោកប្រធានាធិបតី Yoon Suk-yeol លើបញ្ហាជាច្រើន រួមទាំងកម្មវិធីនុយក្លេអ៊ែររបស់ប្រទេសកូរ៉េខាងជើង និងហានិភ័យខ្សែសង្វាក់ផ្គត់ផ្គង់ផងដែរ។

យន្តហោះ Air Force One របស់លោក Biden បានចុះចតនៅមូលដ្ឋានទ័ពអាកាស Osan ក្នុងទីក្រុង Pyeongtaek ដែលមានចម្ងាយ ៧០ គីឡូម៉ែត្រភាគខាងត្បូងទីក្រុងសេអ៊ូល។

ប្រធានាធិបតីសហរដ្ឋអាមេរិក ត្រូវបានគេរំពឹងថានឹងធ្វើដំណើរត្រង់ទៅកាន់រោងចក្រផលិតឈីប Samsung នៅក្នុងទីក្រុងនេះ ដើម្បីជួបជាមួយលោក Yoon និងទស្សនារោងចក្រនេះ ដោយគូសបញ្ជាក់ពីការប្តេជ្ញាចិត្តរបស់ប្រទេសទាំងពីរ ក្នុងការធ្វើការរួមគ្នាដើម្បីពង្រឹងខ្សែសង្វាក់ផ្គត់ផ្គង់។

ដំណើរទស្សនកិច្ចរបស់លោក Biden គឺធ្វើឡើងស្របពេលដែលទីក្រុងសេអ៊ូល និងក្រុងវ៉ាស៊ីនតោន ជឿជាក់ថា ការសាកល្បងនុយក្លេអ៊ែរ ឬមីស៊ីលផ្លោងអន្តរទ្វីបរបស់កូរ៉េខាងជើង ជិតកើតឡើង ហើយអាចនឹងកើតឡើងចំពេលដែលលោក Biden ស្ថិតនៅក្នុងប្រទេសកូរ៉េខាងត្បូង ឬប្រទេសជប៉ុន ដែលជាជើងទីពីរនៃដំណើរទស្សនកិច្ចរបស់គាត់។

នេះជាដំណើរទស្សនកិច្ចលើកដំបូងរបស់លោក Biden ចាប់តាំងពីឡើងកាន់តំណែងមក ហើយដំណើរ​ទស្សនកិច្ច​នេះ ​ក៏​កើត​ត្រឹម​តែ​១០​ថ្ងៃផងដែរ ​បន្ទាប់​ពី​លោក Yoon ចូល​កាន់​តំណែង។

អ្នកទាំងពីរ នឹងជួបគ្នាម្តងទៀតនៅថ្ងៃសៅរ៍ សម្រាប់កិច្ចប្រជុំកំពូលលើកដំបូងរបស់ពួកគេ ដើម្បីពិភាក្សាអំពីបញ្ហាសន្តិសុខ និងសេដ្ឋកិច្ច ដែល សម្ព័ន្ធមិត្ត និងតំបន់កំពុងប្រឈមមុខ។

ប្រធានបទកំពូល ក្នុងចំណោមប្រធានបទទាំងអស់មានដូចជា ការគំរាមកំហែងកាន់តែខ្លាំងឡើងនៃកម្មវិធីនុយក្លេអ៊ែរ និងមីស៊ីលរបស់កូរ៉េខាងជើង ហើយភាគីទាំងពីរត្រូវបានគេរំពឹងថានឹងពិភាក្សាអំពីវិធីដើម្បីពង្រឹងការការពារ និងការទប់ស្កាត់រួមគ្នា៕

ប្រែសម្រួល៖ Vann Vann

ប្រភព៖ YNA

ចុចអាន៖ កូរ៉េខាងជើង អាចបាញ់មីស៊ីល ICBM ពេលលោក Biden ធ្វើទស្សនកិច្ចនៅ កូរ៉េខាងត្បូង និងជប៉ុន