វិមានក្រឹមឡាំង៖ ទំនាក់ទំនង រុស្ស៊ី-អាមេរិក ធ្លាក់ដល់ “ចំណុចសូន្យ” បាត់ទៅហើយ

អ្នកនាំពាក្យវិមានក្រឹមឡាំង បានប្រាប់ទីភ្នាក់ងារសារព័ត៌មាន RIA ថា ទំនាក់ទំនង រុស្ស៊ី-អាមេរិក បានធ្លាក់ដល់ “ចំណុចសូន្យ” បាត់ទៅហើយ។

លោក Dmitry Peskov បាននិយាយថា ស្ទើរតែគ្មានការសន្ទនាសោះ រវាងប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ យោងតាមវិមានក្រឹមឡាំង, ការប្រាស្រ័យទាក់ទងនៅតែសំខាន់ ក្នុងទំនាក់ទំនងជាមួយសហរដ្ឋអាមេរិក ចំពេលមានភាពតានតឹងជុំវិញសង្គ្រាមរបស់រុស្ស៊ី កំពុងបន្តនៅអ៊ុយក្រែន។

លោក Peskov បានប្រាប់អ្នកយកព័ត៌មានក្នុងសន្និសីទមួយកាលពីថ្ងៃពុធទី១៥ខែមិថុនាថា “ការប្រាស្រ័យទាក់ទងគ្នាមានសារសំខាន់ណាស់ នាពេលអនាគតយើងនឹងនៅតែត្រូវប្រាស្រ័យទាក់ទងគ្នា។ សហរដ្ឋអាមេរិក​មិន​ទៅ​ណា​ទេ អឺរ៉ុបក៏​មិន​ទៅ​ណាដែរទេ ដូច្នេះ​យើង​នឹង​ត្រូវ​ទាក់ទង​ជាមួយ​ពួកគេ”។

ស្របពេលជាមួយគ្នានោះ អ្នកនាំពាក្យវិមានក្រឹមឡាំងរូបនេះ បានគូសបញ្ជាក់ថា ប្រទេសរុស្ស៊ី និងសហរដ្ឋអាមេរិក ត្រូវតែពិភាក្សាគ្នា អំពីការបន្តសន្ធិសញ្ញាកាត់បន្ថយអាវុធនុយក្លេអ៊ែរ START។

លោក Peskov បន្ថែមថា បញ្ហានេះមានសារសំខាន់ណាស់សម្រាប់សន្តិសុខពិភពលោក ហើយប្រតិបត្តិការយោធារបស់រុស្ស៊ីនៅអ៊ុយក្រែន មិនមែនជាហេតុផលដែលត្រូវចៀសវាងកិច្ចពិភាក្សានោះទេ។

គួរបញ្ជាក់ថា រុស្ស៊ី និងអាមេរិកកាន់កាប់អាវុធនុយក្លេអ៊ែរជាង ៩០ភាគរយនៃពិភពលោក៕

ប្រែសម្រួល៖ Vann Vann

ប្រភព៖ Al Jazeera, Swiss Info

ចុចអាន៖ អាមេរិក ព្រមាន ចិន ថា កំពុង ប្រថុយ នឹង ការ ចូលខាង ខុស ជាប្រវត្តិសាស្ត្រ