អ៊ុយក្រែន ថា ការស្លាប់របស់កូនស្រី សម្ព័ន្ធមិត្តលោក ពូទីន គឺជា កម្មពៀរ

នាង Darya Dugina ដែលជាកូនស្រីរបស់អ្នកជាតិនិយមរុស្ស៊ី និងជាសម្ព័ន្ធមិត្តរបស់លោកប្រធានាធិបតី វ្ល៉ាឌីមៀរ ពូទីន ត្រូវបានសម្លាប់ដោយការបំផ្ទុះគ្រាប់បែកក្នុងរថយន្តនៅខាងក្រៅទីក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឪពុករបស់នាង គឺលោក Alexander Dugin បានអំពាវនាវជាយូរមកហើយ ឲ្យមានការបង្រួបបង្រួមនៃតំបន់និយាយភាសារុស្សី និងទឹកដីផ្សេងទៀតនៅក្នុងចក្រភពរុស្ស៊ីថ្មីមួយដ៏ធំធេង។ គាត់ចង់បានចក្រភពមួយ ដោយដាក់បញ្ចូលទាំងអ៊ុយក្រែនផងដែរ។

ទាក់ទងនឹងការស្លាប់របស់ Darya Dugina, លោកស្រី Maria Zakharova អ្នកនាំពាក្យក្រសួងការបរទេសរុស្ស៊ី បាននិយាយថា ប្រសិនបើការស៊ើបអង្កេតករណីឃាតកម្ម រកឃើញថា ជាប់ពាក់ព័ន្ធនឹងអ៊ុយក្រែននោះ វានឹងចង្អុលទៅគោលនយោបាយនៃ “អំពើភេរវកម្មរដ្ឋ” ដែលកំពុងបន្តដោយទីក្រុង កៀវ។

ប៉ុន្តែលោក Mykhailo Podolyak ទីប្រឹក្សាប្រធានាធិបតីអ៊ុយក្រែន បានបដិសេធថា ប្រទេសរបស់លោក មិនជាប់ពាក់ព័ន្ធក្នុងការសម្លាប់នេះទេ។ លោកនិយាយតាមទូរទស្សន៍ជាតិថា “យើងមិនមែនជារដ្ឋឧក្រិដ្ឋកម្មឡើយ មិនដូចរុស្ស៊ីទេ ហើយច្បាស់ជាមិនមែនជារដ្ឋភេរវករ”។

ស្របពេលជាមួយគ្នានោះ លោកបានស្តីបន្ទោសទៅលើការតស៊ូអំណាចផ្ទៃក្នុងរវាង បក្សពួកនយោបាយផ្សេងៗ នៅប្រទេសរុស្ស៊ីសម្រាប់ការវាយប្រហារនេះ ហើយបានលើកឡើងថា ឧបទ្ទវហេតុនេះគឺជាកម្មពៀរ ចំពោះអ្នកគាំទ្រសកម្មភាពរបស់រុស្ស៊ីនៅអ៊ុយក្រែន៕

ប្រែសម្រួល៖ Vann Vann

ប្រភព៖ Sky

ចុចអាន៖ តើលោក Alexander Dugin ដែលកូនស្រីរបស់គាត់ ត្រូវស្លាប់ក្នុងការផ្ទុះរថយន្ត ជានរណា?