ប៉ូលិសអាមេរិក ៣ នាក់ទៀតយកជង្គង់សង្កត់ និងវាយក្បាលជនសង្ស័យ​ផ្ទប់ដី (មានវីដេអូ)

មន្ត្រីប៉ូលិសរដ្ឋ Arkansas របស់សហរដ្ឋអាមេរិកចំនួន ៣ នាក់ត្រូវបានដកចេញពីតួនាទី និងផ្អាកបើកប្រាក់ខែ ហើយកំពុងប្រឈមមុខនឹងការស៊ើបអង្កេតពីអង្គភាពរដ្ឋ និងសហព័ន្ធ ក្រោយការបង្ហោះវីដេអូដែលថតដោយអ្នកនៅជិតកន្លែងកើតហេតុបង្ហាញពី មន្ត្រីប៉ូលិសទាំងនោះបានយកជង្គង់សង្កត់ និងវាយក្បាលជនសង្ស័យផ្ទប់នឹងដី បន្ទាប់ពីចាប់ខ្លួន ។

ការបង្ហោះវីដេអូលើបណ្ដាញ Facebook របស់នាយកដ្ឋានប៉ូលិសទីក្រុង Crawford បានឲ្យដឹងថា អត្តសញ្ញាណមន្ត្រីអនុវត្តច្បាប់ដែលពាក់ព័ន្ធនឹងការចាប់ខ្លួននេះមានដូចជា លោក Zack King និង Levi White ជាមន្ត្រីប៉ូលិសរងទីក្រុង Crawford ។

ចំណែកប៉ូលិសម្នាក់ទៀតនោះគឺលោក Thell Riddle ជាមន្ត្រីនៃនាយកដ្ឋានប៉ូលិសទីក្រុង Mulberry ខណៈជនសង្ស័យមានឈ្មោះ Randal Worcester អាយុ ២៧ ឆ្នាំមកពីទីក្រុង Goose Creek រដ្ឋ South Carolina ។

ទន្ទឹមនោះ ការិយាល័យមេធាវីអាមេរិកប្រចាំតំបន់ភាគខាងលិចនៃរដ្ឋ Arkansas បានបញ្ជាក់ថា ការស៊ើបអង្កេតសិទ្ធិពលរដ្ឋលើឧប្បត្តិហេតុនេះត្រូវបានបើកដំណើរការ ខណៈការិយាល័យ FBI និងផ្នែកសិទ្ធិស៊ីវិលនៃក្រសួងយុត្តិធម៌សហរដ្ឋអាមេរិកក៏កំពុងស៊ើបអង្កេតផងដែរ ។

សេចក្តីថ្លែងការណ៍របស់ការិយាល័យមេធាវីអាមេរិកបានឲ្យដឹងថា “FBI និងប៉ូលិសរដ្ឋ Arkansas នឹងប្រមូលភស្តុតាងដែលមានទាំងអស់ ហើយនឹងធានាថា ការស៊ើបអង្កេតត្រូវបានធ្វើឡើងដោយយុត្តិធម៌ ហ្មត់ចត់ និងមិនលម្អៀងឡើយ” ៕

ប្រែសម្រួលដោយ ៖ ជិវ័ន្ត

ប្រភព ៖ CNN

ចុចអាន ៖ កូរ៉េខាងជើង អាចបាញ់នុយក្លេអ៊ែរ មុនការបោះឆ្នោតពាក់​កណ្ដាលអាណត្តិរបស់ អាមេរិក